भांगरभूंय | प्रतिनिधी
भांगरभूंय । प्रतिनिधी
म्हापशेंः केपें तालुक्यांतल्या बाळ्ळी हांगा कांदिमोळ सुबदळें हांगा चलपी चिठ्ठ्यांच्या ऑनलायन जुगार चलतालो ते सुवातेर पुलिसांच्या गुन्यांव फाट्यान छापो घालून हो जुगार चलोवपी सुनील लक्ष्मण वेळीप आनी सुभाष खुशाली वेळीप हांका अटक केली.
मटको जुगारा प्रमाण हो जुगार दुकाना भायर मेजां घालून चलतालो. ह्या जुगार मुंबयच्यान चलयतात. एक रुपयाक 300 रुपये ह्या जुगारांत दितात. लॉटरीच्या चिटयो काडून नंबर काडटात. अटक केल्ल्यां आड गोंय जुगार प्रतिबंदक कायद्या खाला गुन्यांव नोंद केला. न्यायालयान तांका जामिनार सोडलां.
अटक केल्ल्या दुबावितां कडल्यान 9280 रुपये रोख, एक लॅपटॉप, एक स्मार्ट टीव्ही आनी हेर वस्तू मेळून 90 हजारांचो म्हालवज जप्त केला. उपअधिक्षक राजू राऊत देसाय हांच्या मार्गदर्शना खाला निरीक्षक फिलोमिनो कॉस्ता, हवालदार संजय पेडणेकार हांणी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
