भांगरभूंय | प्रतिनिधी
बाप्पा, तूं केन्ना आयलो आनी केन्ना गेलो तेंच कळूंक ना. तुजे वागंडा हासून खेळून दीस कशे गेले तेंच कळूंक ना. बाप्पा, तूं आसतना घर कशें रे आमचे भरलेलें. घरभर वेगळेंच वातावरण आसलेलें. घराच्या कोनश्या कोनश्यांनी तुजेंच रे नांव आयकुपाक येतालें. “गणपती बाप्पा मोरया “…. आनी आतां तूं गेलो आनी आमचें घर सगलें थंड जालें. कोण आसा आनी कोण नाय म्हणूनय कळना.
बाप्पा, तुजे खातीर रे आमचें सगलें गाराणें वर्साक एकदां एक जाल्लें. तूं येवचे पयलीं आमी तुज्या आगमनाचे तयारेक लागलेले. तुजे खातीर पताका, माटोळी आनी तुका बसपाक तरेवार देखाव. आमचें सगलें घर आमी रंगयल्लें. तुजे खातीर नव्यो आरती बसयल्ल्यो. बाप्पा, तुजे खातीर आमी घराचे देवूळ केल्लें. ” गणपती बाप्पा मोरया ” म्हणून आमी तुका घरान हाडलो. राजा, कसो तूं आमच्या घराच्या सालांत बसलेलो. तूं सगलें घर तूं आमचें सांबाळटालो. घरा भायर पसून गेल्यार तूंच आमकां दोळ्यां मुखार दिसतालो.
सगळीं सकाळीं उठून न्हावन धुवन पयलीं तुजी पुजा करताले, बायलां, तुज्या प्रसादाची तयारी करतालीं, जाल्यार दादले – भुरगे घुमट , शामेळ , कांसाळे घेवन घराघरान तुजी आरती करताले, सांजेचीं बायलां तुजे मुखार फुगडी घालतालीं, जाल्यार माणकुलीं भुरगीं फोग लायतालीं…… हो दिनक्रम तू आसतना चालूच आसतालो, आनी तुजे वांगडा दीस कसो सोंपता तोच कळनासलो. सगल्या अडचणी, सगलें दुख्ख विसरून आमी तुजे भक्तीन तल्लीन आसतालीं.
बाप्पा, तूं घरा आसतना कितली सोयरीं- धायरीं, इश्ट, इश्टीणी तुज्या दर्शनाक आमच्या घरा येवन गेलीं रे. तूं आसतना कितले तरेकवार पदार्थ घरांत शिजताले. तुजे सगळ्यांत आवडटे मोदक, लाडू, नेवरी, पातोळ्यो, खतखते, मुगा गाठी, तरेतरेची भाजी, गोडशें….. जेवणाचें पान सारकें भरतालें रे. बाप्पा, तुजेच खातीर आमी सगलीं वर्साक एकदां हासून खेळून जमनीर बसून केळी पानार जेवतालीं.
“गणपती बाप्पा मोरया”, म्हणीत आमी उमेदीन तुका घरा हाडलो. निमणे दिसा गाराणें घालून “पुढच्या वर्षी लवकर या” म्हणीत, नाचत- गायत तुजे न्हंयेंत विर्सजन केलें. तुवें इतले बेगीन घरा वच्चेंशें दिसनासले रे देवा. आनीक थोडे दीस दवरून तुजी सेवा करची आनी सगल्या वांगडां मजा करूं अशेंच मनाक दिसतालें. तूं निरोप घेतना मनाक खूप दुखलें देवा. पूण कितें करतले? शेवटा तूं पुत्र पार्वतीचो. ती तुजी घरा वाट पळयता आसतली म्हणून आमी तुका पायलो.
देवा गणपती, तुजी सेवा करतना आमचे कडेन कसलीय चूक जाल्यार माफ कर. तूं विघ्नहर्ता, आमचेर कसलेंय विघ्न आयल्यार तुंच तें पयस कर रे देवा. सगल्यांक सुखान, आनंदान दवर आनी फुडल्या वर्सा तुजी अशीच सेवा करपाक आमचें आरोग्य
बरें दवर.
गणपती बाप्पा मोरया, पुढच्या वर्षी लवकर या……
नेहाल प्रियोळकार
8806074094
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
