भांगरभूंय | प्रतिनिधी
एक दीस नारदान श्रीविष्णूक विचारलें, “एका बर्या भक्ताच्या सांगातान रावपाचो फायदो किदें?” तेन्ना श्रीविष्णून नारदाक सांगलें, “दंडकारण्यांत वच. थंय पिपळार एक ल्हान पीन जल्माक आयलां. तें तुका हाची जाप दितलें.” हें आयकून नारदाक अजाप जालें. पूण खिणाचोय कळाव करिनासतना तो दंडकारण्यांत पावलो. ताका पिपळ दिसलो. ताचेर एका घोंटेरांत एक ल्हान पील आशिल्लें. नारदान ताका मायेन हात लायलो. जाल्यार त्या पिलान दोळे बंद केले आनी तें मेलें. नारदाक धपकोच बसलो. नारद वैकुंठाक परतलो.
नारदाचें तोंड पडलां तें पळोवन श्रीविष्णून ताका सांगलें, “शरयू न्हंयचे देगेर एका मनशाचें घर आसा. ताचे गायगेर पाडूक जालां. त्या पाडकाक हो प्रस्न विचार.” नारद रोखडोच अद्योद्येक पावलो. गोठ्यांत वचून पाडकाची आनी नारदाची नदर एक जाली आनी पाडूक मेलें. आतां नारदाक खूब वायट दिसलें. तो वैकुंठाक आयलो.
ताका निर्शेल्लो पळोवन श्रीविष्णून ताका सांगलें, “मालवाच्या राजागेर राजकुंवर जाला. हो राजकुंवर तुका तुजी जाप दितलो.” नारदान राजाक सांगलें, “म्हाका एकटोच राजकुंवरा म्हर्यांत रावपाक जाय.” सगली जाणा भायर गेलीं. नारदाक पळोवन भुरगो हांसलो आनी म्हणपाक लागलो, “बर्या भक्ताच्या सांगातान रावन किदें मेळटा हें तुका आजुनूय कळूंक ना?” नारद ओग्गी रावलो. तेन्ना भुरग्यान ताका सांगलें, “पील आसतना म्हाका तुजो, एका पुण्यवान भक्ताचो स्पर्श जालो आनी त्या खिणाक म्हजी अध्यात्मीक उदरगत जावन म्हाका पाडकाचो जल्म मेळ्ळो. परत तुमचो सांगात मेळ्ळो आनी आतां मनीसजल्म मेळ्ळो, तोय बी राजकुंवराचो.” ही काणी आमकां जिवितांतलें एक व्हड सत्य सांगता. बर्या मनशाचो सांगात खीणभर काय जायना, मनशाचे उदरगतींत भर घालता. पुण्यवान आनी बर्या मनशाचो सांगात मेळटकच मनशाची अध्यात्मीक उदरगत जाता. तो अध्यात्माचे वाटेर फुडें पावता. देखून बर्या मनशाच्या सांगातान रावचें.
संपदा कुंकळकार
9850149319
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.