भांगरभूंय | प्रतिनिधी
फोंडें: फर्मागुडी जंक्शनाचेर बिरेस्तारा सकाळीं 10 वरांचेर प्रवासी बस आनी वोल्वो बस हांचे मदीं अपघात जाल्ल्यान तीग जाण जखमी जाले. प्रवासी बशीचो ड्रायव्हर सुजीत सुंदर नायक हो गंभीर जखमी जाला. गंभीर जखमी जाल्ल्या ड्रायव्हराक अदीक उपचारा खातीर गोमॅकाँत दाखल केला. जाल्यार किरकोळ जखमी जाल्ल्या रविजा सुभाष नायक (19, निरंकाल, बेतोडें) हे चलयेक उपचार करून घरा धाडून दिल्या. जाल्यार राजेंद्र रघू नायक (गावणें-बांदोडें) ह्या जखमीचेर उपजिल्हो हॉस्पिटलांत उपचार सुरू आसात. फोंडें पुलिसांनी अपघाताचो पंचनामो केला.
मेळिल्ले म्हायती प्रमाण जीए 01 डब्ल्यू 4519 क्रमांकाची प्रवासी बस फोंडें बस स्टॅण्डा वयल्यान माशेलांत वताली. फर्मागुडी जंक्शनार पावतकूच पुण्यां सावन आयिल्ली एमएच 14 एचजी 4785 क्रमांकाच्या वाल्वो बशीचो धपको बशिल्ल्यान ड्रायव्हरा सयत हेर दोन प्रवासी जखमी जाले. अपघातांतल्या जखमींक 108 अॅम्ब्युलन्सीन उपजिल्हो हॉस्पिटलांत दाखल केले. गंभीर जखमी जाल्ल्या प्रवासी बशीचो ड्रायव्हर सुजीत नायक हाका अदीक उपचारा खातीर गोमॅकाँत धाडून दिलो. जाल्यार हेर दोन जखमींचेर जिल्हो हॉस्पिटलांत उपचार केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.