भांगरभूंय | प्रतिनिधी
दिवचले 80 कोटी खर्च करून सुसज्ज प्रशासकी इमारत
दिवचल: दिवचल म्हालांत प्रशासकी यंत्रणा आनीक गतिमान आनी सक्षम करपा खातीर सगल्यांनी सहकार्य करपाची गरज आसा आनी ते खातीर सरकार अदीक नेट दीत आसा. म्हालांतल्या लोकांचे प्रस्न ताकतिकेन सोडोवपा खातीर सुचोवण्यो दिल्यात. मामलेदार कचेरे खातीर तलाठी, सर्वेर तशेंच हेर पदां भरतनाच ज्यो त्रुटी आसात त्यो ताकतिकेन पयस करपा खातीर आपले यत्न आसतले अशें मुख्यमंत्री डॉ. प्रमोद सावंत हांणी दिवचले उलयतना सांगलें.
सगल्या सहकारी अधिकाऱ्यांनी समाजीक बांदिलकी सांबाळटना लोकांक बरी सेवा दिवप हें तांचें कर्तव्य आसा ते खातीर सरकार बारीकसाणेन लक्ष दिता. लेट लतीफ कामचुकार कर्मचाऱ्यांचो नियाळ घेतात. ताका लागून जापसालदारकी वळखून लोकासेवेक प्राधान्य दिवचें अशें डॉ. सावंत हांणी सांगलें.
मामलेदार कचेरेंत मुख्यमंत्र्यांनी अचकीत भेट दिवन थंयचो नियाळ घेतलो. ह्या वेळार आमदार डॉ. चंद्रकांत शेट्ये, आमदार प्रेमेंद्र शेट बी हाजीर आशिल्ले.
दिवचले सुसज्ज अशी प्रशासकी इमारत सुमार 80 कोटी रुपया खर्च करून उबारतले ते विशीं मुख्यमंत्र्यांनी पोरणी इमारत तशेंच कुशीक आशिल्लें पोरणें पुलीस स्टेशन हे सुवातेर हो प्रकल्प उबारतले अशें मुख्यमंत्र्यांनी सांगलें.
हांगा वन प्लास फायव्ह असो प्रकल्प येतलो. तातूंत खूबशीं प्रशासकी कचेऱ्यो सुरू करतले. तशेंच पयल्या टप्प्यांत वन प्लस थ्री आनी दुसऱ्या टप्प्यांत उरिल्लें बांदकाम जातलें. हांगा कलाभवनाची सुविधा आसतली अशेंय मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
