निर्ला घुमटीची वळख पटली ना

भांगरभूंय | प्रतिनिधी

बेलीप न्यायालयाच्या आदेशाच्या कार्यवाहे बगर गेलो परतून

म्हापशें: कालिघांट, निर्ला हांगासरल्या श्रीकालिमाता देवळाच्या प्राकारांतले घुमटीची वळख पटोवपाक डॉन बॉस्कोच्या धी गोवा सालेशियन सोसायटीच्या प्रतिनिधींक येस आयलें ना. ह्या वेळार घुमटी मोडपाच्या आदेशाची अंमलबजावणी करपा खातीर पुलीस बंदोबस्तांत आयिल्ल्या म्हापशें न्यायालयाच्या बेलीपांक परतून वचचें पडलें.

फाटल्या 13 फेब्रुवारी 2017 दिसा म्हापशेंच्या पयलो वर्ग न्यायालयान याचिकादार धी गोवा सालेशियन सोसायटीच्या नेरूल हांगासरल्या कालिघांट दोंगरा वयले सुवातेंतली घुमटी काडपाचो आदेश जारी केल्लो. हे याचिकेंत दशरथ कळंगूटकार, शिवानंद नायक, अभिजीत बाणावलीकार, शशिकला गोवेकार, प्रकाश कळंगूटकार आनी उमेश कोरगांवकार हांकां प्रतिवादी केल्ले.

ह्या आदेशाची आव्हान याचिका म्हापशेंच्या अतिरिक्त जिल्हो न्यायालयान 13 मे 2022 दिसा भायरायिल्ली. उपरांत फाटल्या 3 एप्रील 2023 दिसा म्हापशें न्यायालयान 2017 वर्सा दिल्ल्या आदेशाची कार्यवाही करपाचे निर्देश दिल्ले.

मंगळारा 27 जून दिसा सकाळीं न्यायालयाचे बेलीप सुनील नायक हे पुलीस बंदोबस्तांत न्यायालयाच्या आदेशाची अंमलबजावणी करपा खातीर आयले. तांचे सयत धी गोवा सालेशियन सोसायटीचे प्रतिनिधी तशेंच पुलीस उपअधिक्षक विश्वेश कर्पे आनी निरिक्षक अनंत गांवकार आशिल्ले. तशेंच श्रीकालीमाता देवळाच्यो अध्यक्षा शशिकला गोवेकार, हेर पदाधिकारी, विश्वस्त, कांय हिंदू संघटणांचे पदाधिकारी आनी ग्रामस्थ व्हड संख्येन हाजीर आशिल्ले. हे कारवाये खातीर व्हड प्रमाणांत पुलीस तैनात आशिल्ले. ताका लागून देवूळ वाठारांत छावणीचें स्वरुप आयिल्लें.

ह्या वेळार धी गोवा सालेशियन सोसायटीच्या प्रतिनिधींक सर्वे क्रमांक 95/1 त आशिल्ली आनी न्यायालयान मातयेभरवण करपाचो आदेश दिल्ले घुमटीची वळख पटोवप शक्य जालें ना. देवळाच्या विश्वस्तांनी सुवातेंतल्या घुमटीचें बांदकाम पाडपाक कसलेच तरेची हरकत नाशिल्ल्याचें ह्या वेळार सांगलें. तरी लेगीत प्रतिनिधींनी घुमटीची वळख दाखोवपाक आनी ती पाडपाक असमर्थताय दाखयली.

ताका लागून न्यायालयाचे बेलीप सुनील नायक हांणी अहवाल सादर करून न्यायालयाचे नदरेक ही गजाल हाडटले, अशें सांगून आदेशाची अंमलबजावणी करूंक शकनाशिल्ल्याचें सांगून तांणी ही कारवाय खंडीत केली.

कालिमाता देवस्थानाचे विश्वस्त पुरुषोत्तम धेंपोन म्हणलें, कालिमातेच्या देवूळ वाठारांतली घुमटी कुशीक काडपाचो आदेश न्यायालयान दिल्लो. हाची अंमलबजावणी करपा खातीर न्यायालयाचे बेलीप आयिल्ले. आमी आदेशाच्या अंमलबजावणीक सहकार्य करपाची हमी दिली. तुमकां दिसता त्या घुमटीचें बांदकाम मोडात आनी हें प्रकरण मिटयात. आमकां अजून तणावाची स्थिती नाका. देविचो कसलोच उत्सव करूंक मेळना. हुमकळटी तरसाद मानेर दवरून रावचें पडटा. पूण धी गोवा सालेशियन सोसायटीच्या प्रतिनिधींक घुमटीची वळख दाखोवंक जमली ना. ताका लागून आदेशाची कार्यवाही जावंक शकली ना अशें तांणी सांगलें.

कालिमाताघांट वाठारांत सर्वे क्रमांक 95/1 आनी 91/1 त 1 लाख 54 हजार चौखण मिटर जमीन आसा. तातूंतली 93 हजार 200 चौमि आनी फुकट 3 हजार चौमि मेळून वट्ट 96 हजार 200 चौमि. सुवात नेरूल कोमुनिदादीन धी गोवा सालेशियन सोसायटीच्या ताब्यांत दिल्या. जाल्यार उरिल्ली 58 हजार चौमि जमीन आमच्या ताब्यांत आसा. सोसायटीच्या आनी देवस्थानाच्या ताब्यांतली खंयची जमीन हाचे स्पश्टताये खातीर जोड रितीन सर्वेक्षण करचें अशी मागणी धेंपो हांणी केली.