नागरिकांचीय जापसालदारकी

भांगरभूंय | प्रतिनिधी

स्वताच्याच नागरिकांचो गैरवापर करपाची ही कृती मनीसपणाक खत लावपी. दुबावूच ना.

अा बैल मुझे मार, असलो प्रकार पाकिस्तान पुरस्कृत आतंकवाद्यांनी केलो आनी हो तळाक गेल्लो देश आतां हाच्या ताच्या पांयां पडपाक लागला. तुर्किये, अझरबैजान सारके कांय देश सोडले जाल्यार कोण तांचे फाटल्यान नात. संवसारीक बँकेनूय तुमचें तुमी पळोवन घेयात, अशें पाकिस्तानाक सांगलां. भारतान आतंकवादी अड्ड्यांचेर हल्लो केले उपरांत पाकिस्तानानूय शिमे वयल्या आमच्या गांवांनी ड्रोन, क्षेपणास्त्रां सोडल्यांत. तातूंतलीं भोवतेक भारतान नश्ट केल्यांत. तीं तांणी तुर्कस्थानांतल्यान हाडल्यांत, अशें दिसून आयलां. हुस्को करपा सारकी गजाल म्हणल्यार दोनूय वटेनचे हल्ले वाडले जाल्यार आमकां सादूर रावचें पडटलें. भारतीयांक सांबाळपाची जापसालदारकी केंद्र आनी राज्य सरकारांची. समाजानूय जागृत रावंक जाय. ते वटेन पाकिस्तानान आपल्या सामान्य नागरिकांक धाल म्हूण वापरपाक सुरवात केल्या. भारतान हल्लो करचो न्हय, म्हूण तांणी विमान उड्डाणां पसून रद्द करूंक नात. आंतरराष्ट्रीय शिमेचेर 36 जाग्यांचेर घुसखोरी केल्या. चारश्यां वयर ड्रोन सोडल्यात ते फक्त स्फोट घडोवपाक न्हय, तर भारतीय गुप्तचर यंत्रणा, हवाई संरक्षण प्रणाली विशीं म्हायती एकठांय करपाकूय. दमासच्यान लाहोराक एक विमान गेल्लें. ताचेर आमी हल्लो केल्लो जाल्यार पाकिस्तानाक आंतरराष्ट्रीय पांवड्यार किळच्यो मारपाक आयती संद मेळपाची. स्वताच्याच नागरिकांचो गैरवापर करपाची ही कृती मनीसपणाक खत लावपी. दुबावूच ना.
पाकिस्तानांतल्या नानकाना साहिब (गुरु नानक हांचें जल्मगांव) गुरुद्वाराचेर भारतान हल्लो केलो, अशें सांगीत आतां पाकिस्तानान हल्लो कारवायेक धर्मीक स्वरुप दिवपाचो यत्न केला. पूंछ वाठारांतल्या गुरुद्वाराचेर तांणी हल्लो केलो. कांय शिखांक मरण आयलें. ताचेर भारत आपल्याच नागरिकांक मारपाक लागला, अशी हुयेल मारीत दोनूय देशांतल्या शीख भावा- भयणींक भितर ओडपाचो यत्न पाकिस्तानान सुरू केला. कॅनडांतले शीख उंचाबळ जावचे, अशें घडये तांकां दिसता आसतलें. हाचे वयल्यान हल्लो वा झूज म्हणटकच कितलें सादूर रावचें पडटा, ताचो अदमास येतलो.
ह्या वेळार प्रसारमाध्यमांनी सादूर रावंक जाय. आतां तर सोशल मिडियाय वांगडा आसा. फटीच्यो खबरो, इझ्रायल, पॅलेस्टीन वा हेर कडले फोटो, व्हिडियो व्हायरल जावपाक लागल्यात. तें करप्यांचेर कारवाय करपाची शिटकावणी भारतान दिल्या. सरकाराच्या पीआयबी संस्थेन तर फॅक्ट फायडींग, फॅक्ट चेक करपाक सुरवात केल्या. म्हणटकच फट, दिशाभूल करपी कितल्यो खबरो आनी व्हिडियो सोशल मिडिया वयल्यान हेडटात आसतले, ताचो अदमास करचो. ‘पाकिस्तानाची राजधानी इस्लामाबाद भारतान ताब्यांत घेतली, भारतीय लश्कर पाकिस्तानांत घुसलें, कराचीचेर हल्लो केलो, पाकिस्तानी प्रधानमंत्री शहबाज शरीफ हांची शरणागती…’ ह्या बातम्यांचे नामनेच्या खबरां चॅनलांचे पोस्ट सध्या सोशल मिडियाचेर भोंवपाक लागल्यात. त्यो खबरो चॅनलांनी सांगल्यात काय कोणे तांच्या नांवान त्यो तयार केल्यात, तें कळना. जर तश्यो खबरो प्रक्षेपीत जाल्यात वा कोणे फटीचे टेम्प्लेट केल्यात, जाल्यार ताची चवकशी केंद्र सरकारान करपाक जाय. हल्लो, झुजा वेळार सगल्यांनीच गंभीर आसचें. लश्करान स्वता जाहीर केले बगर स्वताच अदमास लावन कितेंय सांगप चुकीचें. लोकांनीय कितेंय फाॅरवर्ड करतना विचार करचो.
फक्त ड्रोना वरवींच हल्लो जातलो अशें ना. सायबर हल्लेय जावं येतात. ताका लागून अनवळखी व्हिडियो वा tasksche.exe सारकी फायल, लिंक आयलें जाल्यार तो व्हायरस आसूं शकता, हें मतींत दवरचें. बँक खातीं रिकामी करपाचो तो यत्न. फक्त देशा भायल्यानूच न्हय, तर हे झुजा सारके परिस्थितीचो थळावे सायबर ठकसेनूय गैरफायदो घेवंक शकतात. ही फायल वा हेर कसलेंय लिंक ईमेला वरवींच न्हय, तर सोशल मिडियाचेरूय येवंक शकता.
ह्या काळांत कशें वागचें हे विशीं जिल्होधिकारी, पुलिसांनी सल्लो दिला. सगल्यांनी पयलीं शांत रावपाक जाय. सादूर तर सदांच आसचें. खास करुन दर्यादेगेर रावपी लोकांनी, नुस्तेमारांनी दुबावीत हालचालींचेर लक्ष दवरूंक जाय. कारण मुंबय दर्यांतल्यान आतंकवादी आयिल्ले. पुलिसांनी 112 हो क्रमांक दिला. फट, तिडक- निरशेवणी- उन्माद हाडपी, दिशाभूल करपी, भावनेक हात घालपी मजकूर, व्हिडियोंक येवपी दिसांनी ओतो येतलो. तो कोणाक फाॅरवर्ड केल्यार समाजांत भंय, दुस्वास, तिडक वाडूं येता. तशें जाल्यार तो गुन्यांव अशें पुलिसांनी म्हणलां. लश्करी वा हेर भौशीक इमारती, तळांची म्हायती कोणाक धाडप धोक्याचें थारूं येता. असलें कितेंय हाताक लागल्यार सोमतेंच पुलिसांक कळोवचें, असें आवाहन सरकारान केलां. जिल्होधिकाऱ्यांनीय मार्गदर्शक तत्वां जाहीर केल्यांत. हल्लो जातना वा बंद जातकच दोन तरांचे सायरन वाजयतात, तेन्ना कोणेच कसलीच कृती करपाक जायना. सुरक्षीत जाग्यांचेर रावचें, घरांत भायल्या वण्टीं पसून पयस रावचें, शांतीकाय राखची, फोनाचें नॅटवर्क चड वेळ वापरचें न्हय, ब्लॅक आवट करपाक सांगता तेन्ना घरांतले दिवे, रस्त्या वयल्या गाडयांच्यो लायटी बंद दवरून कांय वेळ रावचें. सुरक्षेचो संदेश मेळटकच जीण परत सुरू जातली. तेन्ना कितें लुकसाण जालां जाल्यार जिल्होधिकारी कार्यालयाक म्हायती दिवची, अशें कळयलां.
नागरिकांनी भियेनासतना परिस्थितीक तोंड दिवंक जाय. अतिउत्साही लोकांनी हल्ले, झूज म्हणजे मनोरंजनाचो इव्हेंट वा सिनेमा न्हय, हें मतींत दवरल्यार बरें.