भांगरभूंय | प्रतिनिधी
बेळगांवी: बेळगांवी हांगासरल्या एसजी बाळेकुंद्री इन्स्टिट्यूट ऑफ टेक्नॉलॉजीच्या स्थापत्य अभियांत्रिकीच्या निमाण्या वर्सां शिकपी विद्यार्थ्याचो महाराष्ट्रांतल्या चंदगड म्हालांतल्या तिलारी घसघश्यार बुडून मरण आयलें.
हार्दीक प्रवीण परमार (22) अशें मरण आयिल्ल्याचें नांव आसा, आनी तो केपें म्हालांतल्या कावरें गांवचो आसा. हार्दीक आयतारा दनपारां आपल्या चार इश्टां सयत तिलारी घसघश्यार गेल्लो. पूण ताका उदकाची खोलाय कळूंक नाशिल्ल्यान तो बुडलो. बेळगांव ग्रामीण पुलिसांनी कूड ताब्यांत घेवन जिल्हो हॉस्पिटलाच्या मड्या कुडींत दवरल्या.
आयतारा सांजवेळा उसरां मरण आयिल्ल्या तरणाट्याचे पालक आनी हेर सोयर्यांनी बेळगांवां धांव घेवन कुडीची वळख पटयली. मरणा उपरांतचे तपासणे उपरांत कूड काल (सोमारा) सोयऱ्यांचे सुवादीन करून निमाण्या संस्कारा खातीर ती गोंयांत व्हेली. ह्या प्रकरणांत बेळगांव ग्रामीण पुलीस स्टेशनार गुन्यांव दाखल केला.
पुलीस आनी महाराष्ट्र अधिकाऱ्यांच्या म्हणण्या प्रमाण हार्दीक आनी ताचे इश्ट पेंवपा खातीर गेल्ली सुवात घातक आसा, आनी थंय आतां मेरेन 50 परस चड लोकांक मरण आयलां.
एसजीबीआयटीचे प्राचार्य डॉ. पतगुंडी आनी कर्मचाऱ्यांनी हॉस्पिटलांत भेट दिवन दुख्ख उक्तायलें. तांणी विद्यार्थ्यांक पिकनिके खातीर घातक सुवातेर वच्चें न्हय अशें आवाहन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
