भांगरभूंय | प्रतिनिधी
पयल्या सिडा वयलो सर्बियाचो खेळगडो नोवाक जोकोविचान चार सेटां मेरेन चलिल्ले मॅचींत बिगरमानांकीत नॅदरलॅण्डाच्या टीम वॅन रिथोवनाक हारोवन विम्बल्डनाचे क्वॉर्टर फायनलींत सुवात मेळयली. ताणें रिथोवनाक 6-2, 4-6, 6-1 आनी 6-2 अशा सेटांनी हारयलो.जोकोविच 13वे खेपे विम्बल्डनाचे क्वॉर्टर फायनलींत सुवात मेळयली. तशेंच विम्बल्डनांत ताचें हें सेगीत 25वें जैत थारलें.
संवसारीक क्रमवारींत 104वे सुवातेर आशिल्ल्या रिथोवनान जोकोविचाक खर आव्हान दिलें. तशेंच दुसरो सेट जिखपाक लेगीत तो येसस्वी थारलो.
सानिया-पाविच जोडी फुडले फेरयेंत
सानिया मिर्झा आनी मॅट पाविच हे भारत-क्रोएशियाचे जोडयेन विम्बल्डनाचे मिश्र गटाचे क्वॉर्टर फायनलींत सुवात मेळयली. सानिया-पाविच हे जोडयेन इव्हान डोडीग आनी लतिशा चान हे जोडये आड फुडली चाल मेळ्ळी.
क्वॉर्टर फायनलींत सानिया-पाविच ही जोडी ब्रुनो सोरेस-बिट्रिज हद्दाद मैया हे ब्राझिलाचे जोडये आड वा जॉन पियर-गॅब्रिएला डाब्रोवस्की हे जोडये आड खेळटली.
सानिया मिर्झाचो अंदूं निमाणो हंगाम आसा. ह्या हंगामा उपरांत ती खेळांतल्यान निवृत्ती घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
