भांगरभूंय | प्रतिनिधी
हसन खान खून प्रकरण:
गोंय खंडपिठाचो निवाडो
पणजी : ताळगांवां 2013 वर्सा जाल्ल्या हसन खान खून प्रकरणांतल्या पांचूय आरोपींची मुंबय उच्च न्यायालयाच्या गोंय खंडपिठान निर्दोश सुटका केल्या. हाचे पयलीं पांचूय जाणांक जल्मठेपेची ख्यास्त जाल्ली.
पांच आरोपींक जल्मठेप ख्यास्त जाल्यार दोगांक निरपराधी थारायिल्ले. हे ख्यास्तीक पांचूय आरोपींनी गोंय खंडपिठांत आव्हान दिल्लें. ह्या प्रकरणांत खंडपिठान आपलो निर्णय आयज दिला.
हसन खानाची कूड ताचे गाडयेंत 22 मार्च 2013 दिसा बांबोळेच्या होली क्रॉस चर्च वाठारांत मेळिल्ली. हसनाचो खून जाला हें स्पश्ट जाले उपरांत आगशीचे पुलीस निरिक्षक शिवराम वायंगणकार हांणी भा.दं.सं.च्या कलम 201 (पुरावे नश्ट करप), 302 (खून), 397 (बळजबरीन चोरी करप) आनी 120 बी (कारस्थान करप) आनी हेर कलमा खाला गुन्यांव नोंद केल्लो.
उपरांत पुलिसांनी खण खात्याचो आदलो कर्मचारी रॉबर्ट गोन्साल्वीस सयत सगल्या सात दुबावितांक अटक केल्ली. आगशी पुलिसांनी 9 जुलय 2013 दिसा पणजे हांगाच्या उत्तर गोंय जिल्लो सत्र न्यायालयांत सगल्या दुबावितां आड 740 पानांचें आरोपपत्र दाखल करून 78 जाणांची गवाय नोंद केल्ली.
उपरांत उत्तर गोंयचे प्रधान सत्र न्यायाधीश शेरीन पॉल हाणें ह्या प्रकरणांत सुनावणी घेतली आनी अभिनंदन पटेल, अनिल भुये, रवी पाटील, अरुण पाटील आनी अनिकेत यल्लूरकार ह्या पांच दुबावितांक आजीवन बंदखण आनी एक लाख रुपया दंडाची ख्यास्त फर्मायली. तशेंच दंड भरूंक ना जाल्यार तीन वर्सांची सादी बंदखण, जबरदस्तीन चोरी केल्यान 10 वर्सां खर बंदखण आनी 50 हजार रुपया दंड आनी हो दंड भरूंक ना जाल्यार दोन वर्सां खर बंदखण अशी ख्यास्त दिल्ली. ते भायर पुरावे नश्ट केल्ल्यान सात वर्सां खर बंदखण आनी 25 हजार रुपया दंड आनी हो दंड भरूंक ना जाल्यार 1 वर्स खर बंदखणीची ख्यास्त दिल्ली. ह्या प्रकरणांतले मुखेल मास्टरमाइंड रॉबर्ट गोन्साल्वीस आनी शिवाजी पाटील हांकां पुरावो नाशिल्ल्यान निरपराधी थारायले.
हे प्रकरणांत राज्य सरकारान वयल्या दोन दुबावितांक आनी आजीवन बंदखणीची ख्यास्त फर्मायल्ल्या पांचूय आरोपींक मुंबय उच्च न्यायालयाच्या गोंय खंडपिठांत आव्हान दिल्लें. ह्या प्रकरणांत न्या. महेश सोनक आनी न्या. भारत पी. देशपांडे हांच्या द्विसदस्यीय खंडपिठान सुनावणी उपरांत पांचूय जाणांक निर्दोश थारायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
