भांगरभूंय | प्रतिनिधी
वाहन चालकांची, लोकांची, शाळेंतल्या भुरग्यांची धांदळ
पंचायतीन विनंती करुनूय केली आडनदर
म्हापशें: कोलवाळे राष्ट्रीय म्हामार्ग प्राधिकरण आनी एमव्हीआर कंपनीन सर्व्हीस रोड पुराय केल्लो ना. ह्या अर्दकुटे स्थितींत उडयिल्लो रस्तो पावसाक लागून चिखलान भरलो. मुशीरवाड्या वयल्या लोकांची आनी खास करून शाळेंतल्या भुरग्यांची मात ह्या रस्त्याक लागून धांदळ जाली.
म्हामार्गाचें रुंदीकरण करतना एमव्हीआर इन्फ्रा ह्या कंत्राटदार कंपनीन मुशीरवाडो कोलवाळे सर्व्हीस रोड रस्तो अर्दकुटो सोडून दिला. हो रस्तो मुशीरवाड्या वयल्या लोकांक आनी कोलवाळ उद्देगीक वसणुकेंत वचपी कामगार वर्गा खातीर फायदेशीर आसा. पूण तो पुराय करूंक नाशिल्ल्यान वाड्या वयल्या लोकांचे आनी कामगारांचे हाल जायत आसात.
कोलवाळ पंचायतीन हे विशीं म्हामार्ग प्राधिकरण आनी एमव्हीआर कंपनीक हो रस्तो पुराय करपाची वेळावेळार विनंती केल्ली, पूण ताचे कडेन संबंदितांनी आडनदर केली.
सद्या पावसाक लागून हो रस्तो चिखलान भरला. ह्या चिखलांतल्यान वतना लोकांक आनी खास करून शाळेंतल्या भुरग्यांक मनस्ताप सोंसचो पडटा. भुरग्यांक दोन किलोमिटर अंतराक रेवाडो घालून शाळेंत वचचें पडटा. तशेंच वाहन चालकांकूय रस्त्याचो त्रास जायत आसा.
पंचायतीन एमव्हीआर कंपनी आनी राष्ट्रीय म्हामार्ग प्राधिकरणाक हो अर्दकुटो रस्तो पुराय करपाची खूबशे फावटी विनंती केल्ली. पूण तांणी पंचायतीचे सुचोवणे कडेन आडनदर केली. प्रशासकी यंत्रणेच्या अपेसाक लागून मुशीरवाड्या वयल्या लोकांक आयज ह्या चिखलाचे समस्येक सामकार वचचें पडटा असो आरोप आदले सरपंच नित्यानंद कांदोळकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
