भांगरभूंय | प्रतिनिधी
-केंद्रांतल्यान सात जाणांचो पंगड गोंयांत; चांचपणी सुरूपणजीः गोंयांत मुखेल विरोधी पक्ष आशिल्ल्या काँग्रेसींतय फुडल्या काळांत अंतर्गत बदल जावपाची शक्यताय आसा. येवपी विधानसभा वेंचणुके मेरेन राज्य काँग्रेसीक घटमूट करपा खातीर राष्ट्रीय काँग्रेसीन सात जाणांचो पंगड गोंयांत धाडला, आनी हो पंगड राज्यांतल्या राजकी वातावरणाचो आनी वेंचणूक जिखपा खातीर खंयचे बदल करूं येतात हाचो अभ्यास करता अशें सुत्रांनी सांगलें.
लोकसभा वेंचणुकेंत दक्षीण गोंयांत जैत मेळयले उपरांत आनी हेर राज्यांनीय बरे यश मेळ्ळे उपरांत काँग्रेसीच्या फुडाऱ्यांचो आत्मविस्वास वाडला. हाचो फायदो घेवन राष्ट्रीय काँग्रेसीन 2027 वर्सा गोंय विधानसभा वेंचणूक जिखपाचे यत्न पयलींच सुरू केल्यात. ताचोच एक भाग म्हूण सात जाणांचो पंगड गोंयांत धाडला. हो पंगड फाटल्या कांय दिसां सावन वेगवेगळ्या वाठारांतल्या नागरिकां कडेन आनी राजकी तज्ञां कडेन गोंयच्या राजकी परिस्थितीचेर चर्चा करता आनी फुडल्या दोन वर्सांत कितें बदल करूं येता हाचो विचार करता अशें सुत्रांनी सांगलें.
विजय सरदेसाय हांकां घेवपाचो विचार
नॅशनल काँग्रेसीचे वरिश्ठ फुडारी सध्या विरोधी फुडारी युरी आलेमांव हांच्या कामगिरीचेर समाधानी नात. ताका लागून गोवा फॉरवर्ड पक्ष काँग्रेसींत विलीन करून विजय सरदेसाय हाका विरोधकांचो फुडारी म्हूण वेंचून काँग्रेस घटमूट करपाचो विचार ताणें सुरू केला. गोंयांत आयिल्लो पंगड जायत्या जाणां कडेन चर्चा करता अशें सुत्रांनी स्पश्ट केलें.
पक्षा भितर व्हड बदलाची शक्यताय
सध्या काँग्रेसीचे प्रदेश अध्यक्ष अमीत पाटकार पक्षाचो विस्तार करपाचो यत्न करीत आसा. पूण, तांकां अजून कांय फुडाऱ्यांचो तेंको मेळना. ताचो परिणाम पक्षाच्या कामगिरीचेर जावपाक लागला. देखून पक्षा भितर व्हड बदल करून पोरण्या आनी नव्या फुडाऱ्यांक एकठांय हाडपाचोय निर्णय पक्षान घेतला. फुडल्या कांय म्हयन्यांत हे बदल सुरू जावपाची शक्यताय आसा अशें सुत्रांनी सांगलें.
म्हाका कांयच खबर ना: ठाकरे
राष्ट्रीय काँग्रेस पंगडान गोंयांत येवन जायत्या गजालींची चांचपणी सुरू केल्या, हे विशीं काँग्रेसीचे गोंय प्रभारी माणिकराव ठाकरे हांचे कडेन संपर्क सादलो तेन्ना तांणी सांगलें, तांकां हे विशीं कांयच खबर ना. विजय सरदेसाय विशींच्या प्रस्नाक आपणाक खबर ना अशीय ताणें जाप दिली. हे संबंदी राज्य अध्यक्ष अमीत पाटकार हांचे कडेन संपर्क करपाचे यत्न जाले, पूण ताचे कडेन संपर्क जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
