भांगरभूंय | प्रतिनिधी
म्हापशें: कोलवाळ पुलिसांनी घुंवळे वखदां विरोधी कारवाये खाला अनिकेत कुमार (23, रा वेर्णाव, मूळ बिहार) हाका अटक केली. दुबाविता कडल्यान अडेज कील गांजो जप्त केलो.
चार रस्तो कोलवाळे बिरेस्तारा दनपारां घुंवळे वखदांचे विक्रेचो वेव्हार जावपाचो आशिल्ल्याची म्हायती पुलिसांक मेळिल्ली. ते प्रमाण सांपळो रचून दुबाविताक पुलिसांनी धरलो.
झडटे वेळार ताचे कडेन अडेज कील गांजो सांपडलो. ह्या गांज्याचें मोल अडेज लाख रुपया आसा. हो गांजो पुलिसांनी जप्त केला आनी घुंवळे वखदां प्रतिबंधक कायद्या खाला गुन्यांव नोंद करून दुबाविताक अटक केली.
पुलीस निरिक्षक सोमनाथ माजीक हांच्या मार्गदर्शना खाला उपनिरिक्षक मंदार परब, हवालदार रुपेश कोरगांवकार, कॉन्स्टेबल सुरज किनळेकर, संदीप मळीक, मंदार कांबळी आनी सदाशीव परब ह्या पंगडान ही कारवाय केली, फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
