एकवटींत विरोधक अधिवेशनांत सरकाराक उक्तें पाडटलेंः युरी

भांगरभूंय | प्रतिनिधी

इव्हेंटांंचेर सरकाराचो 500 कोटींचो खर्च

भांंगरभूंंय प्रतिनिधी

पणजी : पावसाळी अधिवेशनांत सगले विरोधी पक्ष एकठांंय येवन सरकाराचो गैर कारभार उक्ताडार हाडटले. हेर विरोधी पक्षांं कडेन उलोवणी सुरू आसा. सरकाराचो गैरकारभार उक्ताडार हाडपाक राजकी मतभेद कुशीक दवरून हेर विरोधी पक्षांंनी काँग्रेसी सयत एकठांंय येवचे, असो उलो अशें विरोधी पक्ष फुडारी युरी आलेमांव हांंणी मारला.

काँग्रेस विधीमंंडळ गटाची मंंगळारा विधानसभा संंकुलांत बसका जाली. प्रदेश काँग्रेस अध्यक्ष अमीत पाटकार हे बसकेक हाजीर आशिल्ले. बसके उपरांंत घेतिल्ले पत्रकार परिशदेक आमदार कार्लोस फेरेरा, एल्टन डिकोस्ता, प्रदेश काँग्रेस अध्यक्ष अमीत पाटकार हाजीर आशिल्ले. हेर पक्षांं कडेन रणनिती थारावपा खातीर बसका जातली.

आमदारांंचे बसकेंत सरकाराच्या गैरकारभाराचेर चर्चा जाली. म्हादय प्रस्न सुटावो करपाक सरकार अपेशी थारलां. केंंद्रान कर्नाटकाच्या डीपीआराक मान्यताय दिल्या. हो डीपीआर फाटीं घेवपाची मागणी विधानसभेंत केल्ली. अजून डीपीआर फाटीं घेवंक ना. म्हादय उदक वेवस्थापना खातीर स्थापन जाल्ले प्रवाह प्राधिकरण हो एक स्वतंंत्र विशय आसा. म्हादय प्रस्नाचेर गोंयचे हीत सांंबाळपाक सरकाराक अपेस आयलांं.

अप्रेंटीस येवजण हो एक जुमला

अप्रेंटीस येवजणे खाला 10 हजार नोकऱ्यो दिवपाचें आस्वासन मुख्यमंंत्र्यांंनी दिलांं. अप्रेंटीस येवजण हो आनीक एक जुमला आसा. वेंचणूक लागी आयले उपरांत सरकार नोकऱ्यांंचें आस्वासन दितां. नोकऱ्यांंचेर सरकार फटयतां. अप्रेंटीस येवजण 17 फेब्रुवारी 2021 दिसा जाहीर जाल्ली. दोन वर्सां सरकारान ताची कार्यवाही कित्याक केली ना? हो एक जुमला आसा, असो आरोप युरी आलेमांव हांंणी केला. गोंयांत बेरोजगारीचें प्रमाण सगळ्यांंत चड आसा. नवे प्रकल्प सुरू करपाक सरकाराक अपेस आयलांं. बंद पडिल्लो खण उद्देग सुरू करपाक सरकाराक अपेस आयलांं.

इव्हेंटांचेर 500 कोटींचो खर्च

भाजप सरकार हें इव्हेंट मॅनेजमेंट सरकार. सरकारान धा वर्सात इव्हेंटाचेर 500 कोटींचो खर्च केला. हो मुद्दो अधिवेशनांत उपस्थीत जातलो. सौर उर्जा तयार करपाचें सरकाराचे धोरण आसा. रेल्वे दोट्टीकरण, तमनार प्रकल्प आनी म्हामार्ग रूंंदीकरण हांंकां सभाघरांत विरोध जातलो.

अबकारी भानगड : अटक कित्याक ना?

अबकारी भानगड ही दिसता ताचे परस बरीच व्हड भानगड. हाची खोलायेन चवकशी जावपाक जाय. अजून मेरेन कोणाकूच अटक कित्याक जावंंक ना? असो प्रस्न आमदार अॅड. कार्लोस फेरेरा हांणी केला.