भांगरभूंय | प्रतिनिधी
बंद उद्देग सुरू करपा खातीर लीज भाड्यांत सवलत
भांगरभूंय । प्रतिनिधी
पणजी : उद्देगीक वसणुकेंतले 605 बंद उद्देग सुरू जावचे म्हूण आयडीसीन दंडाची रक्कम माफ करपा सयत लीज भाड्याच्या हप्त्यांत सवलत दिवपी येवजण जाहीर केल्या. हे येवजणेचो लाव घेवन बंद उद्देग सुरू जावचे हो उद्देश आसा.
उद्देगीक म्हामंडळाची बसका जावन बंद उद्देग सुरू करपाचेर विचार जालो. कोवीड काळांत उद्देगीक मंदी आशिल्ली. हाका लागून खूबशे उद्देग बंद पडले. कांय उद्देग सुरू जाले. कांय उद्देग आजून सुरू जावंक ना. वट्ट 605 उद्देग बंद आसात. हे उद्देग भाडेपट्टी (लीज रेंट) फारीक करिनात. हप्ते तशेंच कळंतर मेळून 47 कोटी रूपया आयडीसीक येणें आसा. हप्त्याचें कळंतर 11 टक्क्यां वयल्यान 6 टक्क्यां मेरेन उणें करपी ही येवजण आसा. हातूंतल्यान आयडीसीक 9 कोटींचो फटको बसतलो. तरी 36 कोटी रुपयांचो महसूल येवप शक्य आसा.
ही येवजण 24 जूनाक सुरू जातली. अर्ज करपा खातीर म्हयन्याची मुजत आसतली. 11 बदला 6 टक्के कळंतरान 8 हप्त्यांनी थकीत रक्कम भरची पडटली. येवजणेचो लाव घेवन लीज रेंट थकबाकी फारीक केली ना, जाल्यार भूखंड परत घेवपाची कारवाय जातली. हाचे उपरांत येवजण आसची ना, अशें आयडीसीचे अध्यक्ष अलेक्स रेजिनाल्ड हांणी पत्रकार परिशदेंत जाहीर केलें. येवजणे खातीर अर्ज केल्या उपरांत उद्देग दुसऱ्याच्या नांवाचेर करपाचो पर्याय आसा. उत्पादनांत बदल करपाची मेकळीक आसा. हाचे खातीर सवलत दिवपाची तयारी आसा. बंद उद्देग सुरू जाले जाल्यार रोजगार तयार जातले, अशें आलेक्स रेजिनाल्ड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
