भांगरभूंय | प्रतिनिधी
लखनौ, खबरां संस्था: उत्तर प्रदेशांतल्या बहराइच हांगाच्या एका मुस्लीम तरणाट्याची लग्नाची पत्रिका सध्या सोशल मीडियाचेर व्हडा प्रमाणांत व्हायरल जाता. व्हायरल जावपा फाटल्यान एक व्हड कारण आसा. हें मुस्लीम कुटुंबांतलें पयलेंच कार्ड आसतलें जातूंत श्री गणेशाक पयलेंच आमंत्रण दिलां. तशेंच पंचांक लेगीत ह्या लग्नांत साक्षीदार जावपा खातीर उलो मारलो. हिंदू रितीनूच लग्न जातले अशें ह्या मुस्लीम तरणाट्यान म्हणलां. ह्या तरणाट्यान आपल्या लग्नाची पत्रिका आपल्या समाजांतले वांगडी आनी सोर्यांकूच न्हय तर हिंदू धर्मा कडेन संबंदीत लोकांकूय दिली.
आता ही लग्नपत्रिका सोशल मीडियाचेर व्हडा प्रमाणांत व्हायरल जाता. बहराइच्या सफीपूर गांवांत रावपी अजुल कमर हांचो पूत समीर अहमद हाचें २९ फेब्रुवारीक लग्न जावपाचें आसा. लग्नाक आनीक एक सप्तक उरलां. ताचे पयलींच ही लग्नपत्रिका व्हायरल जातना दिसता. हिंदू रिती प्रमाण छापिल्लें हें कार्ड श्री गणेशाय नमः न सुरू जाता.
ताचेर उत्सवा पसून शुभविवाह, न्हंवर्या खातीर ‘चिरंजीवी’ आनी व्हंकले खातीर‘आयुष्मती कुमारी’ अशें शब्द बरयल्यात. हिंदू लग्नपत्रिकेंत अशे शब्द वापरतात. जारवाल रोड हांगचे जुमेराती हांची धूव सानिया खातून हिच्या वांगडा समीरचें लग्न निश्चीत जालां. नेमां प्रमाण मुस्लीम समाजाचे लग्नपत्रिकेचेर ‘निकाह’ वा इंग्रजी शब्द ‘वेड्स’ वापरतात. मात हे पत्रिेचेर ‘शुभ विवाह’ हो शब्द वापरला.
समीरचो बापूय उजुल हांकां हे पत्रिके विशीं विचारलें तेन्ना, ह्या लग्नाचें आमंत्रण मुखेलपणान हिंदू भावांक धाडटा. ताका लागून तांणी हिंदू रिती प्रमाण आमंत्रण पत्रिका छापल्या. तशेंच तांणी आपल्या समाजांतल्यान लोकां खातीर आनी सोयर्यां खातीर उर्दूंत छापिल्लीं कार्डां आसात. अजुल हांणी फुडें सांगलें, ह्या लग्नांत फकत कार्डांच न्हय तर जायत्यो गजाली वेगळ्यो आसतल्यो. हातूंत लग्नाच्या एका दिसा पयलीं हिंदूं भावां खातीर जेवणाचें आयोजन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
