भांगरभूंय | प्रतिनिधी
पावसा वाऱ्याचे अदमासय कांय वेळार चूकतात. दक्षिणेचो वारो उत्तरेक, उत्तरेचो उदेंतेक, अस्तमेक व्हांवता. अदमास करपी गिरे, उपगिरे (मनशान सोडिल्ले आनी गिऱ्यांतल्यान जल्मल्ले) ब्रह्मांडांत चड जाल्यात व्हय? तेच बदलतात, थारायतात दिका. उजवे दाव्यान वतात, तेन्ना दाव्यांनी उजू मार्ग धरलो जाल्यार अजाप न्हय. पावस आनी वाऱ्याचेंय तशेंच, खिणाखिणांत दिका बदलपी, आपालिपाय करपी.
उजव्या दाव्यांचें गणीत अंदमानांतच न्हय राजस्थानातय शिजता, विदेशांतय धांवता. ज्येश्ठनीत वरिश्ठांनी आमकां सांगली, पावसाकय राजा केलो, पावसांत भिजपाकय लायलें. पावसूच आमकां अन्न दिता ही म्हायती दितना समाजमन विसरचें न्ही अशें कोडू वखदांचे डोस दिले. कित्याक काय बदलता समाजमन? पावसा वाऱ्याची तांकां भिरांत दिसता व्हय? भिवपाची गरज ना. इत्साशक्त आसल्यार तुमचे तुमीय दोतोर जावंक शकतात, अक्षरांचें आनी वखदां दिवपी.
उटंगाराच्या पावसांत ज्येश्ठांनी, भुरग्यांनी घरा भायर कित्याक वचचें? शिक्षक ऑनलायन शिकोवंक शकतात, कोविडान ती वाट आमकां दाखयली. तीच आयज, फाल्यां केळयल्यार? रों रों वारो, उटंगाराच्या पावसांतय एकच रस्त्यान, मार्गान वचपी व्हांवून वचना. वारो, पावस नाटक करता? गीतां गायता? दर्यादेगेर वचून आपटता? दर्या, न्हंयांनी थेंब्या थेंब्यांनी एकठांय जाता? एका थेंब्याकय म्हत्व आसा, थेंबो थेंबो झरे, वझऱ्यांनी गेल्यार तातूंतल्यान दर्या जाता. दर्याच्या ल्हारांतल्यान उर्जा, वीजनिर्मणेचे यत्न करपाची गरज आसा. उदेंतेच्या पावसान आनी अस्तमेच्या वाऱ्यान, दर्यादेगेवेल्या रेंवेतल्यान वीजनिर्मणी जायत व्हय?
पावसा वाऱ्याची म्हायती वेगीं पावयतना चूक जाता, माफ करात अशें सुरवेकच म्हळ्यार ? आमीय विद्यार्थी जाल्यार? पावस, वारो थांबचोना, पावस तुमचे आमचेर निंबून ना. सैमाक घावे जातात तेन्ना सैम राकेस जाता, लुकसाण करता चारीय दिकांनी मळब फुट्टा.
अचकीत आयिल्ल्या पावस वाऱ्याचे अचूक हिशोब केल्यार भुंयेंत जिरिल्ल्या उदकाचोय उपेग करुंक येता. म्हजे भुंयेतलें उदक पुरायेन इबाडचेंना हे खातीर जतनाय घेवपाचें उतर दिवन उतराक पाळोय दितले. मनीसच न्हय शेतां भाटांय ज्या उदकाचेर जियेतात तेंय पावसाचेंच उदक न्हय? जेन्ना पावस कमी पडटा तेन्ना धरणांनी सांठयिल्लें उदक उणें पडटा, ल्हान धरणां बांदल्यार तांची आमची म्हादय वाटावतली.
पावसाचो थेंबो हातार घेवपाक आयिल्ले भोंवडेकार पावसांत भिजचेपरस रुमांत रावन बोटांवयले मनरिजवणेंत गुल्ल रावंक शकतात. चिखलकाल्याचो आस्वाद लंडन ते गोंयां मेरेन घेवंक येता. कांय वेळार चिखोल काळो, तांबडो, भांगराळीय आसतलो, निमणे तो तांचे, आमचे भांगरभूंयेंतलो.
आषाढ पांवळी शारांतली, गांवांतली विंगड विंगड. ह्या शारांतली, त्या शारांतलीय, गांवागांवातलीय काळी आनी तांबडी. नळ्यांवेल्यान आंगणांत गळपी, काँक्रिटाच्या वण्टींनी जिरपी. ते मातयेचो वास वेगळो. उटंगाराचो पावस एकादशीक अळम्याचो उटंगार घेवन येत व्हय? अळमी उटंगारांत व्हावंन गेलीं? नदर मारल्यार कळटलें अळमी सदांच विकूंक येतात ते सुवातेर. सादूर रावात अळमी विदेशांतय पावतात, पांच नखेत्री हॉटेलवालेय घेतात.
उटंगाराच्या पावसाचे दोन दीस, चार दीस, भिजल्यार एक दोन सप्तकां भलायकी इबाडटा. उदक तापोवन पिल्यार, न्हंयांक फातरांची वंय घाल्यार, घरा बसून वावराची संवय केल्यार फुडली पिळगीय शाणी जाता. ज्येश्ठांचे भुरगीं आयज आयकतलींच अशें ना पूण ज्येश्ठांनी सांगप कित्याक सोडप?
गोंयचो उटंगाराचो पावस हेर राज्यांतल्यांक थाकाय दिवपी, पावसांत घाम हाडपी सुर्याक धांपपी. गोंय चिखोलकालो मनयतना उत्तर प्रदेश आंब्याचें प्रदर्शन घडोवन हाडटा थंय गोंयचो तोतापुरी, निलम, मानकुराद, मुसराद आजय ना फाल्यां पावोवपा पासत तजवीज करुया.
उटंगाराचो पावस केन्ना सोंपतलो आयज कित्याक चिंतया? पावसाचो उटंगारय जाय, विसवय जाय. पावसा वाऱ्यांत चलत वतल्यांक भिवपाची गरज ना. तीच तर ज्येश्ठनीत, घरांत आनी घराभायरय वत, शिंयात आनी पावसांत भोंवपाची. पांच नाका शंभर पावलां चलात, पावला पावलाचेर पायलेक पन्नास भोंवडेकार मेळटले, भोंवडेंतल्यान गोंयकारय जातले. तांकां गोंयांतलो उटंगाराचो पावस उजवो, दावो दिसत पूण तो मनीसपणाचो वझरो. मनीसपण गोंयांत आयजय आसा, ज्येश्ठांनी तें आमकां शिकयलां, भोंवडेकारांनीय मनीसपणाक पाळो दिवचो. यो रे पावसा म्हणूया, शिकुया, वाचुया. गीतां नवीं, काणयो नव्यो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
