भांगरभूंय | प्रतिनिधी
पुलीस – शेतकारां मदीं धक्काबुक्की, कांय जाण जखमी, प्रकल्पाच्या सर्वेक्षणाक शेतकारांचो खर विरोध
भांगरभूंय I प्रतिनिधी
सांगेंः सांग्यार आयआयटी प्रकल्पाच्या जमनीच्या सर्वेक्षण कामा वेळार शेतकार आनी पुलिसां मदीं धक्काबुक्की जावन हातूंत कांय जाण जखमी जाल्यात. जमखी जाल्ल्यां मदीं निकेल कुलासो, कोंसेसांव वाझ, इनासीन ग्रासियस, बिंदिया गांवकार आनी हेरांचो आस्पाव आसा. सांग्यार आयआयटी प्रकल्पा आड शेतकारांनी आक्रमक भुमिका घेतिल्ल्यान पयलेच खेपे तणावाचें वातावरण निर्माण जावन धक्काबुक्की जावपाची घडणूक घडल्या.
आयआयटी प्रकल्पा खातीर जमनीचें सर्वेक्षण जावपाचे आसा, हाची सुलूस शेतकारांक लागले उपरांत शेतकारांनी सर्वेक्षण करपाक येवपी कर्मचाऱ्यांचो रस्तो आडावन धरलो. तशेंच आमच्या शेतजमनीचें सर्वेक्षण करपाक दिवचे नात, अशी शिटकावणी अधिकाऱ्यांक दिली.
ह्या वेळार मोट्या प्रमाणांत शेतकार हाजीर आशिल्ले. तशेंच खर पुलीस बंदोबस्त आशिल्लो. उपअधिक्षक निलेश राणे, सांगें पुलीस निरिक्षक विनायक पाटील, केपें पुलीस निरिक्षक दीपक पेडणेंकार, मामलेदार राजेश सांखळकार हाजीर आशिल्ले. उपजिल्होधिकारी मात हाजीर रावंक नाशिल्ले.
आयआयटी प्रकल्पा आड सांगेंकारांनी आपलीं शेतां-भाटां वाटावपाचे यत्न चलयल्यात. आमचीं शेतां, दोंगर, सैम, सासाय पेड्डेर करून आमकां आयआयटी नाका अशें सातत्यान सांगून लेगीत सरकार आयकून घेना, अशें शेतकारांचें म्हणणें आसा.
मुख्यमंत्री डॉ. प्रमोद सावंत, तशेंच थळावे आमदार सुभाष फळदेसाय हांणी आयआयटी आमच्या माथ्यार थापपाचो यत्न केल्यार सगले शेतकार रस्त्यार देंवतले, अशी शिटकावणीय तांणी दिल्या.
ह्याच विशया वयल्यान शेतकार आक्रमक जावन व्हड बोवाळ जालो. ह्या वेळार उप अधिक्षक निलेश राणे हांणी लोकांक समजावन रस्त्या वयल्यान कुशीक काडपाचो यत्न केलो. पूण शेतकार आयकले नात. उपरांत शेतकार आनी पुलीस हांचें मदीं वाद जावन धक्काबुक्की जाली. हातूंत कांय लोक जमनीर पडून चिड्डले आनी जखमी जाले. तशेंच पुलिसां कडल्यान धक्काबुक्की चालू आसतनाच शेतकारांनी राष्ट्रगीत म्हणपाक सुरवात केली. राष्ट्रगीत सोंपले उपरांत शेतकार रस्त्याचेर बसले. ताका लागून वातावरण अदिकूच तापलें.
आमच्या जमनींचें सर्वेक्षण करपाचो तुमकां अधिकार ना, तुमी परत वचात, आयआयटी आमकां नाका, आमची शेतां आमकां जाय अशो घोशणा शेतकारांनी दिल्यो. ते उपरांत पुलीस आनी शेतकारां मदीं जाल्ले धक्काबुक्कींत कांय जाण जखमी जाले. हातूंत पुलिसांची चूक आसा म्हणप फावना. तांकां तशी वयल्यान ऑर्डर मेळिल्ली आसपाक शकता, अशें कांय शेतकारांनी
सांगलें.
हे विशीं मामलेदार राजेश सांखळकार हांकां विचारल्यात तांणी म्हायती दिवपाक न्हयकार दिलो.
सांग्यार शेळ-मेळावली प्रमाण स्थिती उप्रासुये
सांग्यार आयआयटी प्रकल्पा खातीर चडांत चड जमनीचें सर्वेक्षण जालां. कांय जमनीचें सर्वेक्षण जावपाचे आसा. काल सर्वेक्षण करपाक अधिकारी येवपाचे अाशिल्ल्याची शेतकारांक सुलूस लागले उपरांत तांणी रस्तो आडावन धरलो. अधिकाऱ्यांक सर्वेक्षण करपा पसून आडायले. ह्या वेळार मोट्या प्रमाणांत शेतकार एकठांय जाल्ले. सांग्यार जावपी एकदंर परिस्थिती पळयल्यार अशें दिसून येता, सांगेंकारांचो आयआयटी प्रकल्पाक खर विरोध आसा. शेतकारांचें आंदोलन केन्नाय हिंसक मोडण घेवपाक शकता. आनी परतून शेळ-मेळावली प्रमाण हांगा स्थिती उप्रासपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
