भांगरभूंय | प्रतिनिधी
नजीर खानः उरिल्ल्या तीन आमदारांकूय भाजपांत वचपाचो सल्लो
भांगरभूंय । प्रतिनिधी
मुरगांवः काँग्रेस पक्षाचे आठ आमदार भाजपांत गेले, ताका गोंय प्रदेश काँग्रेस समितीचे अध्यक्ष अमीत पाटकार पुरायपणान जापसालदार आसात, असो आरोप गोंय प्रदेश काँग्रेस अल्पसंख्यांक विभागाचे आदले अध्यक्ष नजीर खान हांणी केला.
वास्को बायणाचे गोंय प्रदेश काँग्रेस अल्पसंख्याक विभागाचे आदले अध्यक्ष नजीर खान हांणी आपल्या कार्यालयांत घेतिल्ले पत्रकार परिशदेंत हो आरोप केलो. ह्या वेळार तांचे वांगडा एल्विनो आरावजो, साजीद खान आनी हेर मानेस्त हाजीर आशिल्ले.
प्रदेशाध्यक्ष पाटणकार हांचे भाजपा कडेन बरे संबंद आसात. ताकाच लागून गोंयांत काँग्रेसीची आवतिकाय जाल्या. काँग्रेस पक्षाचे आमदार भाजपांत गेले तातूंत भाजपाची कसलीच चूक ना. काँग्रेसीचे ते आठूय आमदार पयशां खातीर भाजपांत गेल्यात. गोंयांत काँग्रेस पक्ष सोंपिल्ल्यांत जमा जाला. काँग्रेसींत उरिल्ल्या हेर तिनूय आमदारांनी लेगीत भाजपांत प्रवेश करचो, असो सल्लो खान हांणी दिलो.
मडगांवचे आमदार दिगंबर कामत आनी कळंगूटचे आमदार मायकल लोबो हे दोगूय अंमलबजावणी संचालनालयाच्या (ईडी) भंयान भाजपांत गेल्यात. जाल्यार हेर स आमदार कोटींनी रुपयां मेळटले हे आशेन गेल्यात, असोय आरोप खान हांणी केलो.
मुरगांवचे आमदार संकल्प आमोणकार हांणी भाजपांत प्रवेश करून एके तरेन लोकां वांगडाच अल्पसंख्यांकाचो अपमान केला. मुरगांव बंदरांतल्या कोळशाक विरोध करपी आमोणकार हांणी हे मुखारूय कोळशाक विरोध करपाचें धाडस करचें, अशें आव्हान खान हांणी तांकां दिलें.
प्रदेशाध्यक्षांक आदींच शिटकायल्लें: नजीर खान
आपल्या मतदारसंघाची उदरगत करचे खातीर ते आठूय काँग्रेस आमदार भाजपांत गेल्ल्याचें सांगून लोकांची दिशाभूल करतात. फाटले विधानसभा वेंचणुकेंत काँग्रेसी खातीर लोकां कडेन मतां मागून तांची फटवणूक केल्या. काँग्रेसीचे आठ आमदार भाजपांत प्रवेश करतले, अशें आपणें आदींच प्रदेशाध्यक्ष पाटकार आनी केंद्रीय काँग्रेस समितीच्या पदाधिकाऱ्यांक पत्रा वरवीं कळयिल्लें. त्या वेळार आपूण स्पश्ट उलयल्लों हे खातीर प्रदेश काँग्रेसीन आपल्याक कारणां दाखय नोटीस जारी केल्ली. ह्या कारणाक लागून आपल्याक गोंय प्रदेश काँग्रेस अल्पसंख्यांक विभागाचो राजिनामो दिवचो पडिल्लो. गोंयांत काँग्रेस पक्ष मातये भरवण जाला. हे मुखार लोक काँग्रेसीक केन्नाच तेंको दिवचे नात, असो दावो नजीर खान हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
