भांगरभूंय | प्रतिनिधी
364 कील नुस्त्याची केली पावणी; धनयांचेर जातली कारवाय
वास्को: नुस्तेमारी करपाक बंदी आसून लेगीत वेळसांव दर्यादेगेर थळाव्या व्हडें धनयांनी नुस्तेमारी करतकूच नुस्तेमारी खात्याच्या अधिकाऱ्यांनी 20 व्हडीं जप्त करून तातूंतलें 364 कील नुस्त्याची पावणी केली. जाल्यार नुस्तेमारी बंदी परंपरीक नुस्तेमारांक लागू जायनासतनाय संबंदीत अधिकाऱ्यां कडल्यान तांचो छळ जायत आशिल्ल्याचो आरोप वेळसांवच्या परंपरीक नुस्तेमारांनी केला. तशेंच सोलार सुंगटां जेन्ना दिसतात तेन्ना ती धरपाची गरज आसा. नाजाल्यार ती दर्यांत वतात. हे संबंदी आमी संबंदीत खात्याच्या अधिकाऱ्यांक खूबशे फावटी समजावन सांगलें, पूण ते संबंदीची जाप दिवपा बदला ते दंड दितात अशें कांय व्हडेंकारांनी सांगलें.
नुस्तेमारी बंदी आसून लेगीत वेळसांवां व्हडें धनयांनी नुस्तेमारी केल्ल्याची म्हायती मेळटकूच संबंदीत खात्याचो अधिकारी वर्ग दर्यादेगेर पावलो. त्या वेळार तांच्या चपक्यांत 20 नुस्तेमारी व्हडीं सांपडलीं. तीं व्हडीं जप्त केलीं. संबंदीत व्हडें धनयांचेर वरिश्ठ अधिकारी योग्य ती कारवाय करतले. जप्त केल्ल्या नुस्त्याची सुमार 47 हजार 320 रुपयांक पावणी केली.
ही कारवाय नुस्तेमारी खात्याचे अधिक्षक रोहिता नायक, सहाय्यक अधिक्षक रोशनी नायक, अधिकारी रवी रॉड्रिगीश, सागर नायक, दीपक कुंकळ्ळीकार, गोपाळ जुवाटकार हांणी केली. ह्या वेळार कसलोच वायट प्रकार घडचो न्हय हे खातीर वेर्णा पुलीस स्टेशनाचे निरिक्षक डायगो ग्रासियस आनी हेर पुलीस हाजीर आशिल्ले.
सर्वोच्च न्यायालयाच्या आदेशा प्रमाण परंपरीक नुस्तेमारांक 9.9 एचपीची मोटर आशिल्लें व्हडें वापरून नुस्तेमारी करूं येता. पूण दर्यांत नुस्तेमारी करपा खातीर वतना सुरक्षीततायेचे उपाय म्हूण आमी आनीक एक आलायती मोटर दवरतात. आमी बंदी आदेश मोडून नुस्तेमारी केली ही खबर फटीची आशिल्ल्याचो दावो परंपरीक नुस्तेमारांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
