भांगरभूंय | प्रतिनिधी
जून, जुलय म्हयन्यांतलो पावस थारलो मारक
दिवचले, सत्तरे सगल्यांत चड लुकसाण
पणजी: अंदूं गोंयांत पडिल्ल्या विक्रमी पावसाक लागून जून आनी जुलय ह्या दोन म्हयन्यांत वीज खात्याचे खांब, विद्युत वाहिन्यो पडून तशेंच ट्रान्सफॉर्मराचें लुकसाण जावन सुमार आठ कोटींचें लुकसाण जालां. पावसाचें प्रमाण उणें जातकच खात्याचे अभियंते, कर्मचाऱ्यांनी गरज आसा थंय नवे खांबे उबारून आनी विद्युत वाहिन्यो जोडून वीज पुरवण सुरळीत करपाक सुरवात केल्ल्याची म्हायती खात्याच्या गोपांनी आयतारा ‘भांगरभूंय’ कडेन उलयतना दिली.
मॉन्सुनाच्या पावसान राज्यांत अंदूं खवदळ घालो. मॉन्सुनाचे सुरवेक सावनूच सुरू जाल्लो उटंगाराचो पावस जुलय सोंपमेरेन कायम उरलो. ताका लागून खूबश्या वाठारांनी घरां, झाडां पडून थळाव्यांचें कोट्यांनी रुपयांचें लुकसाण जालें. उटंगाराच्या पावसाचो शेतांकूय फटको बशिल्ल्यान शेतकारांकूय लुकसाणेक सामकार वच्चें पडलें.
तेचप्रमाण वीज खात्याच्या साधनसुविधांचोय उटंगाराच्या पावसाक लागून मोटें लुकसाण जालें. जून आनी जुलय ह्या दोन म्हयन्यांत जाल्ल्या वादळी पावसाक लागून खूबश्या वाठारांतले विजेचे खांब कोसळून सकयल पडले. ताका लागून तांचे वेल्यो सरयो तुटल्यो. तशेंच ट्रान्सफॉर्मरांनी पावसाचें उदक वचून तांचेंय लुकसाण जालें. ताका लागून जून आनी जुलय ह्या दोन म्हयन्यांत वीज खात्याक सुमार आठ कोटींच्या लुकसाणेक सामकार वच्चें पडलें.
पावसाचें प्रमाण उणें जातकच खात्याचे अभियंते आनी कर्मचाऱ्यांनी कोसळिल्ल्या खांब्याचे सुवातेर नवे खांबे घालून तशेंच नव्यो विद्युत वाहिन्यो जोडून राज्यांतली वीज पुरवण सुरळीत करपाचो यत्न सुरू केला.
उटंगाराच्या पावसाक लागून खूबश्या वाठारांनी अशे तरेच्यो घडणुको घडल्यात. ताका लागून कांय वाठारांतलीं कामां पुराय जाल्यांत, जाल्यार कांय कडेन कामां सुरू आसात. लुकसाण जाल्ले वीज ट्रान्सफॉर्मर लेगीत बदलतात. चवथी पयलीं हीं सगलीं कामां पुराय करपाचे नदरेन कामां सुरू केल्यांत अशें गोपांनी सांगलें.
चार म्हालांनी व्हड लुकसाण
अंदूं जून आनी जुलय ह्या दोन म्हयन्यांत पेडणें, दिवचल, सत्तरी तशेंच सांगें ह्या म्हालांत वादळी पावस पडलो. ताका लागून ह्या म्हालांत वीज खात्याक चड लुकसाणीक सामकार वच्चें पडलें. थंय कोसळिल्ल्या वीज खांब्याचे सुवातेर नवे खांबे उबारून ते नव्या वाहिन्यां वरवीं जोडपाचें काम खात्या कडल्यान सुरू आशिल्ल्याचें गोपांनी सांगलें.
खूबश्या वाठारांनी विजेचो आपालिपा
– गोंयांत पावसाचो नेट उणो आसून लेगीत खूबश्या वाठारांतली वीज पुरवण सेगीत खंडीत जायत आशिल्ल्यान थंयच्या थळाव्यां कडल्यान वीज खात्या आड तिडक उक्तायतात.
– बार्देस, दिवचल, सत्तरीतल्या खूबश्या गांवांनी सद्दां खूबशीं वरां वीज गायब जाता. ताचो फटको थळाव्यांक बसता. ते विशींच्यो कागाळी थळाव्या वीज खात्याच्या संबंदीत विभागांनी करतात. पूण तांकां वेवस्थीत जापो मेळनाशिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
