गिमाच्या दिसांनी कुडींतली उदकाची पातळी देंवता, ते खातीर ….

भांगरभूंय | प्रतिनिधी

पालक आनी तवश्यांत ९६ टक्के उदक, टोमॅटो ९५ टक्के आनी काळंगांत ९२ टक्के उदक आसता. आतां गीम सुरु जाला देखून भरपूर उदक आशिल्लीं फळां आनी भाजयो आहारांत आसप म्हत्वाचें. कुडींतली उदकाची पातळी, इलेक्ट्रोलायट संतुळा आनी एकंदर भलायकी सांबाळपा खातीर हे खासा फायदेशीर थारूंक शकता.
कुडीच्या वेगवेगळ्या कार्यां खातीर फावो त्या प्रमाणांत उदक गरजेचें आसता, तातूंत कुडीचें तापमान नियंत्रीत दवरप, पचनक्रियेक आदार करप, पोशक तत्वां सांबाळप आनी विखारी पदार्थ भायर काडप हांचो आस्पाव जाता. देखून कुडींत उदकाची पातळी योग्य दवरपा खातीर कांय फळां आनी भाजयो हांचो आहारांत आस्पाव करप गरजेचें.

काळिंग – काळंगांतत सुमार ९२ टक्के उदक आसता. ते भायर अँटिऑक्सिडंट्स, पोटॅशियम, जीवनसत्व सी, लायकोपीन, बीटा कॅरोटीन, तंतू आनी जैव सक्रिय वनस्पती रसायनां भरपूर आसतात. गोडेंमूत जाल्ल्या दुयेंतींनी काळिंग खावचें. कारण काळगाचो उच्च ग्लायसेमिक इंडेक्स (GI) ७२ आसा जो मध्यम ते उच्च मानतात. पूण, ९२ टक्के उदक आनी तंतू चड आशिल्ल्यान जेवणा उपरांत रगतांत साकर सोडपाक कळाव करता आनी भूक उणी करुन कॅलरीजाचे सेवन मर्यादीत करता. काळगान ग्लायसेमिक भार खूब उणो आसता जो दर 120 ग्रामांत पांच इतलो आसा.

तवशें – तवश्यांत सुमार ९६ टक्के उदक आसता. तातूंत तंतूचें प्रमाण चड आशिल्ल्यान पचन करपाक मजत जाता आनी पोट भरल्याचे जाणावता. ताका लागून चड खावपाची शक्यताय उणी जाता आनी जेवणा उपरांत साकर वाडना. तवश्यांत दाहक गुणधर्म आसतात आनी तातूंत पोटॅशियम आनी मॅग्नेशियम हीं संयुगां आसतात. जीं रगतपेशी रुंद करून रगतदाबाची योग्य पातळी सांबाळपाक फायदेशीर थारता. ताका लागून काळजाचो आताक येवपाचो धोको उणो जाता. तंतू कोलेस्टेरॉल नियंत्रीत करता. तवश्यांत ग्लायसेमिक इंडेक्स (GI) उणो आसता हाका लागून रगतांतली साकर स्थीर दवरपा खातीर हो एक फायद्याचो पर्याय थारता.

टोमाट – टोमाटांत सुमार ९५ टक्के उदकाचें प्रमाण चड आसता. तातूंत जीवनसत्वां, खनिजां आनी लायकोपीन सारकिल्ले अँटिऑक्सिडंट्स भरपूर आसतात. काळजाचे दुयेंस आनी कांय प्रकारच्या कॅन्सराचो धोको उणो करपा खातीर टोमाट फायद्याचो थारता. सॅलड, सॅण्डविच वा जायत्या आहारांत टोमॅटोचो आस्पाव करप गिमाच्या दिसांनी कुड हायड्रेटेड दवरपाचो एक सोपो मार्ग आसूं येता.

पालेभाजयो – पालेभाजयांनी फकत पोशक घटकच न्हय तर तातूंत उदकाचें प्रमाणय चड आसता. सादारणपणान ९०% ते ९६% उदकाचें प्रमाण आसता. देखून ह्यो भाजयो पचनक्रिया, रोगप्रतिकार शक्त आनी काळजाचे दुयेंसा खातीर तशेंच भलायकेक बऱ्यो मानतात.