गिमाळ्यांत लागपी आंबो पावसांत लागलो
भांगरभूंय | प्रतिनिधी
चंद्रपूरांतली घडणूक, वातावरण बदलाचो परिणाम
चंद्रपूर, खबरां संस्था : चंद्रपूरांत (महाराष्ट्र) एक अजाप करपा सारकी घडणूक घडल्या. गिमाच्या दिसांनी लागपी आंबो पावसांत लागिल्ल्यान सगळ्यांक अजाप जालां. वातवरणाच्या बदलाक लागून हो प्रकार घडिल्ल्याचें तज्ञांनी सांगलें.
गिमाचे सुरवेक आंबो चंवरता. मागीर फळां येवंक लागतात. पूण, हांगाच्या सिस्टर कॉलोनी नगीनाबाग वाठारांतल्या अजिंक्य कुशब कायरकराच्या घरांतल्या आंब्याक पावसाच्या दिसांनी आंबे लागल्यात. खरें म्हणल्यार चंवर येता मार्चांत. उपरांत एप्रील आनी मे म्हयन्यांत आंबे ल्हवू ल्हवू पिकतात. पूण अंदूं चंद्रपूर जिल्ह्यांतल्या हवामानांत खूब बदल घडलो. गिमाच्या दिसांनी हांगा पावस पडलो. जून आनी जुलय हे दोनूय म्हयने सुके आशिल्ले. मागीर पावसाचो हंगाम सुरू जालो.
मदींच पावस गायब जाल्ल्यान चड गर्मी जाली. पर्यावरणांत व्हड बदल जालो. ह्या हवामानांतल्या बदलाचो परिणाम फळझाडांचेरूय दिसता. पर्यावरणांतल्या ह्या बदलाक लागून हंगाम नासतना आंब्याच्या झाडाक आंबे लागल्या अशें पर्यावरणवादी सांगतात. २०२३ वर्सा संवसारीक वातावरणांत खूब बदल जाला. ह्या बदलाचो बारीकसाणेन अभ्यास करप गरजेचें. हो बदल फुडारा खातीर चिंतेचो थारूंक शकता अशें तज्ञांनी सांगलें.
दर वर्सा आमच्या घरांतल्या आंब्याच्या झाडाक गिमाच्या दिसांनी आंबो तयार जातालो. हें झाड आतां २० वर्सां पोरणें जालां. पूण, अंदूं व्हड पावस आसूनय आंबे पिकल्यात. वातावरणांतल्या बदलाक लागून अशें घडलां आसूं येता. हाचे पयलीं अशें केन्नाच जावंक ना, अशें अजिंक्य कुशाब कायरकर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
