भांगरभूंय | प्रतिनिधी
तुमकांय गजाली विसरपाची समस्या आसा आनी ही समस्या बरोच तेंप तिगून उरल्या जाल्यार आतां लक्ष दिवचें. हें अल्झायमर दुयेंसाचें लक्षण. संवसारभर ३.५६ कोटी परस चड लोकांक ह्या दुयेंसाची पिडा आसा. ते विशीं जागृताय करपा खातीर २१ सप्टेंबराक संवसारीक अल्झायमर दीस मनयतात. संवसारीक भलायकी संघटनेच्या म्हणण्या प्रमाण २०३० मेरेन अल्झायमर दुयेंतींची संख्या दुपेटीन जावंक शकता. ह्या दुयेंसाक लागून मनीस गजाली विसरूंक लागता. आदीं ही समस्या पिरायेच्या ५० वर्सां उपरांत जाताली, पूण आतां ३० ते ४० वर्सां पिरायेचे लोक ताचो बळी पडटात. अल्झायमर दुयेंसाक लागून याद आनी विचार हांचे संबंदीत समस्या निर्माण जातात. सुरवातेक ह्या दुयेंसाचीं लक्षणां सहजपणान दिसनात, पूण तें वाडत वता तशें तें मेंदवाक इबाडूंक लागता. कांय प्रकरणांनी त्या मनशाची याद खूब दुबळी जाता. ह्या दुयेंसाचेर आयज मेरेन वखद मेळूंक ना.
जायत्या प्रकरणांनी दुयेंतींक हें दुयेंस आपल्याक आसा हे कळना. याद उरपाचो प्रॉब्लेम आसलो तरी लोकांक तो पिरायेचो प्रॉब्लेम दिसता आनी दोतोरा कडेन ते तपासना. अशे परिस्थितींत हो रोग कुडींत वाडटा आनी मागीर गंभीर जाता. पिराय वाडत वचत हो रोग धोक्याचो जाता आनी कांय प्रकरणांनी मनीस सगळें विसरपाक लागता. अशे परिस्थितींत तो आपल्या जिवितांतल्या दर एका वावराक दुसर्या मनशाचेर आदारून आसता.
लोकांक अल्झायमराची खबर ना अशें शस्त्रक्रिया वैज म्हणटात. लोक ताका मानसीक दुयेंस वा पिशेंपण अशें मानतात, पूण तशें ना. ह्या कारणाक लागून हें दुयेंस सुरवेक वळखूंक मेळना. अशे परिस्थितींत लोकांक अल्झायमराचीं लक्षणां कळपाक जाय.
ह्या लक्षणां कडेन लक्ष दवरात
परत परत विसरप
उलोवपाक अडचण
चलपाक वा तोल दवरपाक कठीण
लोकां पासून पयस रावप
खंयच्याच कामांत रूची नासप
एकदां अल्झायमर दुयेंस जाल्यार ताचेर वखद मेळना. पूण दिसपट्टे जिणेंत कांय जतनाय घेतल्यार ह्या दुयेंसाची शक्यताय उणी जावंक शकता अशें शस्त्रक्रिया वैज सांगतात. फावो ती न्हीद घेवप, मानसीक ताण टाळप, आहाराची जतनाय घेवप आनी दिसपट्टो व्यायाम करप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
