भांगरभूंय | प्रतिनिधी
लोकसभा बरखास्त जाल्ल्यान तेन्ना विधेयक थारलें काळा भायरें
पणजी : नारी शक्ती वंदन अधिनियम वा बायलां आरक्षण विधेयक लोकसभेंत चर्चा सुरू जावन संमत जालें. हे फांटभुयेर बायलां आरक्षण विधेयकाचो इतिहास आनी ताचे फाटभुंयेर चर्चा जावप संयुक्तीक आसा. संसद आनी विधानसभेंत बायलांक 33 टक्के आरक्षणाची तजवीज आशिल्ले विधेयक सगल्यांत पयलीं लोकसभेंत सादर करपाचो मानो केंद्रीय कायदो मंत्री ह्या नात्यान 27 वर्सां पयलीं अॅड. रमाकांत खलप हांकां मेळ्ळो. एच. डी. देवेगौडा हे देशाचे प्रधानमंत्री आसतना 12 सप्टेंबर 1996 ह्या दिसा देशाचो कायदो मंत्री ह्या नात्यान आपणें हें विधेयक संसदेंत सादर केल्लें, अशी म्हायती अॅड. खलप हांणी दिली. बायलां आरक्षण विधेयक सादर करपाचो मान म्हाका मेळ्ळो हाचो म्हाका अभिमान आसा अशें अॅड. खलप हांणी हे विशीं उलयतना सांगलें.
हांवें बायलां आरक्षण विधेयक लोकसभेंत सादर केलें. हाचे उपरांत ते चर्चे खातीर जोड संसदीय समिती कडेन गेलें. 1998 वर्सा लोकसभा बरखास्त जाली आनी ह्या विधेयकाचो प्रवास सोंपलो. बायलां आरक्षण विधेयक संमत करपाचे यत्न 27 वर्सां पयलीं तेन्नाचे प्रधानमंत्री एच. डी. देवेगौडा हांणी लेगीत केल्ले अशी याद अॅड. खलप हांणी ह्या वेळार केली. पयलेच खेपे लोकसभेंत सादर जाल्ल्या बायलां आरक्षण विधेयकाचो मसुदो लेगीत हांवें तयार केल्लो अशें अॅड. खलप हांणी सांगलें. बायलां आरक्षण विधेयकाच्या इतिहासीक प्रक्रियेंत म्हजो वांटो आसा, हाचो म्हाका अभिमान आसा अशें अॅड. खलप हांणी सांगलें.
प्रधानमंत्र्यां सयत कॉफी पितना जाली चर्चा
1 जून 1996 ह्या दिसा एच. डी. देवेगौडा हांणी देशाचे प्रधानमंत्री म्हूण सोपूत घेतलो. उत्तर गोंयच्यान महाराष्ट्रवादी गोमंतक पक्षाच्या उमेदवारीचेर वेंचून आयिल्ले अॅड. रमकांत खलप हे कायदो आनी न्याय खात्याचे राज्यमंत्री आशिल्ले. तांचे कडेन खात्याचो स्वतंत्र कारभार आशिल्लो.
एखाद्या मंत्र्यां कडेन म्हत्वाच्या विशयाचेर चर्चा करपाची आसली काय प्रधानमंत्री देवेगौडा हे त्या मंत्र्यांक निवासाचेर च्या पियेवपाक आपयताले. असोच एक दीस म्हाका फोन आयलो. तेन्ना रॅक्स पद्दतीचे फोन आसताले. ब्रदर कम फॉर ए कॉफी…अशें फोनाचेर म्हाका निमंत्रण आयलें. सकाळीं 6 वरांचेर हांव प्रधानमंत्र्यांच्या बंगल्यार गेलों. कॉफी पिता पिता बायलां आरक्षणाचो विशय प्रधानमंत्र्यांनी मांडलो. मसुदो तयार करपाचें काम सुरू करपाक प्रधानमंत्र्यांनी सांगलें. अधिकाऱ्यांचे मजतीन हांवें बायलां आरक्षणाचो मसुदो तयार केलो. मसुदो तयार करून चवथीच्या वेळार 12 सप्टेंबर 1996 ह्या दिसा हांवें हे विधेयक 81वी घटना दुरुस्ती विधेयक म्हूण लोकसभेंत हांवें सादर केलें अशें अॅड. खलप हांणी सांगलें. उपरांत हें विधेयक चर्चे खातीर जोड संसदीय समिती कडेन गेलें.
21 एप्रील 1997 मेरेन एच. डी. देवेगौडा प्रधानमंत्री आशिल्ले. देवेगौडा उपरांत सर्गेस्त इंद्रकुमार गुजराल प्रधानमंत्री जाले. गुजराल प्रधानमंत्री आसतना खलप कायदो आनी न्याय खात्याचे मंत्री आशिल्ले. 1998 वर्सा लोकसभा बरखास्त जाली आनी वेंचणुको जाल्यो.
शारी बायलांच पावतल्यो लोकसभेंत
बायलां आरक्षण विधेयकाक 1996 वर्सा लेगीत विरोध नाशिल्लो. समाजवादी पक्षाचे फुडारी आनी तेन्नाचे संरक्षण मंत्री सर्गेस्त मुलायमसिंह यादव हांणी विधेयकाक दुरुस्तीचो प्रस्ताव सुचयिल्लो. केंद्रीय मंत्रीमंडळ बसकेंत तांणी हो प्रस्ताव सुचयिल्लो. अनुसुचीत जाती, जमाती तशेंच हेर मागासवर्गीय बायलां खातीर आरक्षणाची तजवीज विधेयकांत आसपाक जाय. ही तजवीज नासली जाल्यार शारी वाठारांतल्यो बॉबकट करपी बायलांच लोकसभेंत पावतल्यो, असो मुद्दो तांणी मांडिल्लो, अशें अॅड. खलप हांणी सांगलें.
डॉ. मनमोहन सिंग प्रधानमंत्री आसतना 9 मार्च 210 दिसा बायलां आरक्षण विधेयक राज्यसभेंत संमत जाल्लें. तेन्ना हें विधेयक लोकसभेंत आयलें ना.
स्थानीक स्वराज संस्थांनी बायलांक 33 टक्के आरक्षणाची तजवीज आशिल्ले विधेयक 1992 वर्सा संमत जालें. सर्गेस्त पी. व्ही. नरसिंहराव हे तेन्ना प्रधानमंत्री आशिल्ले. हाचे पयली सर्गेस्त राजीव गांधी प्रधानमंत्री आसतना सप्टेंबर 1989 वर्सा हें विधेयक लोकसभेंत संमत जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
