भांगरभूंय | प्रतिनिधी
15 लाख 59 हजार रुपया खर्च करून कामाक गती
फोंडें: फोंडें पालिका मंडळान फाटल्या कितल्याशाच वर्सां सावन लोकांक सतावपी हेडग्या गोरवांचो त्रास उणो करपा हेतान खासा गोशाळा उबारपाक सुरवात केल्या. बेतोडें पंचायत वाठारांतल्या निरंकाल हांगा 15 लाख 59 हजार रुपया खर्च करून गोशाळा उबारपाचें काम नेटान सुरू आसा. ही गोशाळा बिगर सरकारी संस्थे कडेन दितले. उपरांत फोंडें पालिका वाठारांतल्या हेडग्या गोरवांचो प्रस्न नियंत्रणांत येतलो.
फोंडें पालिका वाठारांत हेडग्या गोरवांचो प्रस्न गंभीर जायत चल्ला. थळावे आमदार आनी कृशी मंत्री रवी नायक हांच्या यत्नाक लागून फोंडें पालिका मंडळान हेडग्या गोरवांचो प्रस्न आडावपा खातीर गोशाळा उबारपाचाे निर्णय घेतला. फाटल्या कांय दिसां सावन सुरू आशिल्लें काम रोखडेंच पुराय जावपाच्या मार्गार आसा. फोंडें पालिका वाठारांतलीं हेडगीं गोरवां खाशेल्या वाहनांतल्यान गोशाळेंत व्हरतले. गोशाळेंत दाखल जावपी गोरवांची देखभाल बिगर सरकारी संस्था करतली.
फोंडें शारांत लोकांक हेडग्या गोरवांचो त्रास सोंसचो पडटा. कितल्याशाच लोकांच्या पोतयांनी तोंड घालपी गोरवांचेर कारवाय करपाची मागणी लोक करीत आशिल्ले. राजीव गांधी कला मंदिरा मुखार, तिस्क फोंड्यां, वारखंडे, शांतीनगर, खडपाबांद आनी हेर सुवातांनी रस्त्यार ठाण मांडून बसपी गोरवां रातच्या वेळार अदीक घातक जाल्लीं. रातच्या वेळार दुचाकीचो धपको गोरवांक बसून खूबशे जाण जखमी जावपाचे प्रकार घडिल्ले. गोशाळा उबारिल्ल्यान अपघाताचेर कांय प्रमाणांत नियंत्रण येवपाची शक्यताय उक्तायतात.
फोंडें पालिकेचे नगराध्यक्ष रितेश नायक हांणी उबारतल्या गोशाळेची पळोवणी केली. ह्या वेळार नगरसेवक आनंद नायक, पालिकेचे मुख्याधिकारी शुभम नायक, पालिका अभियंतो दीपक देसाय आनी हेर पदाधिकारी हाजीर आशिल्ले. ह्या वेळार म्हायती दितना नगराध्यक्ष रितेश नायक हांणी गोशाळेचें काम रोखडेंच पुराय जातलें. गोशाळेंत दाखल केल्ल्या गोरवांची देखभाल बिगर सरकारी संस्था करतली. गोशाळा सुरू जाले उपरांत पालिका वाठारांतल्या लोकांक सतावपी हेडग्या गोरवांचो त्रास निश्चीत उणो जातलो अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
