भांगरभूंय | प्रतिनिधी
दिसाक 1 हजार फुलांचें पीक घेवपाचो निश्चेव
फोंडें: बेतोडें पंचायत वाठारांतल्या कोनशें-निरंकालचे उत्कृश्ट बागायतदार तशेंच समाजसेवक हेमंत सामंत हे वेगळेवेगळे प्रयोग करीत आसतात. मिरीचें व्हड प्रमाणांत पीक घेतले उपरांत ‘रेड डाखा’ म्हूण वळखतल्या तांबड्या केळीची येसस्वी लागवड केली. सद्या चाफ्याचे बागायतीक तांणी सुरवात करून नव्या प्रयोगाक सुरवात केल्या. गोंयच्या खांची कोनशांनी रेड डाखा केळी पावोवपाचो यत्न करपी हेमंत सामंत हांणी एका दिसांत एक हजार चाफ्याच्या फुलांचें पीक घेवपाचो निश्चेव केला.
बापूय रंगाची प्रभाकर सामंत हांच्या मार्गदर्शना प्रमाण तांणी केळी बागायती कडेन लक्ष केंद्रीत केलें. कांय वर्सां पयलीं एका बागायतदरान हेमंत सामंत हांकां ‘रेड डाखा’ ह्या केळीचें रोंप दिल्लें. ताची बरे तरेन जतनाय घेवन तांबड्या केळीक आयिल्लो पयलो घड बागायतदार बाजाराचे अध्यक्ष तशेंच आदले खासदार नरेंद्र सावयकार हांकां भेटयलो. फाटल्या कांय वर्सां सावन तांबड्या रंगाच्या केळीचे रोंप खूबशा इश्टांक दिवन पीक वाडोवपाचो यत्न करतना महाराष्ट्रांत लेगीत रेड डाखाचे रोंपे पावयले.
कांय वर्सां पयलीं बागायतींत लागवड केल्ल्या चाफ्याचीं फुलां सद्या तांकां मेळटात. ते खातीर हेमंत सामंत हांणी ह्या वर्सा 70 परस चड चाफ्याच्या झाडांची लागवड केल्या. कांय वर्सां पयलीं लागवड केल्ल्या चाफ्याची दरेक दिसा सुमार 300 परस चड फुलां तांकां मेळूंक लागलीं. फोंडेंच्या गोवा बागायतदार बाजारांत लेगीत तांणी फुलां विक्रे खातीर दिल्लीं. सुगंधीत चाफ्याचें एक फूल अडेज ते तीन रुपया ह्या मोलान विकतात. महाराष्ट्रांतल्या वेंगुर्ला तशेंच कुडाळ हांगा सावन हेमंत सामंत हांणी चाफ्याच्या झाडांची कलमां खरेदी करून फुलाचें उत्पादन वाडोवपाचेर अदीक भर दिला.
बागायतदार हेमंत सामंत हांणी सुगंधीत चाफ्याच्या फुलांक बाजारांत मागणी वाडल्या. गोंयांत बरी बाजारपेठ आशिल्ल्यान ह्या वर्सा व्हड संख्येन चाफ्याच्या झाडांची लागवड केल्या. दरेक दिसा 1000 सुगंधीत फुलां फुडलीं दोन तीन वर्सां घेवपाचें उद्दिश्ट दवरलां. रेड डाखा सारकीं नवी आनी पुश्टीक केळीं सगल्या बागायतदारा मेरेन पावोवपाचो यत्न सुरू आशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
