भांगरभूंय | प्रतिनिधी
11 दीस सेवा करून कोरोना संक्रमणाची पावयतले आंगवण
फोंडें: निरंकाल-बेताेड्यां रावपी वानरमारी जमातीचे लोक अंदूं 11 दीस गणपतीची सेवा करून आंगवण पावयतले. कोरोना महामारी वेळार जमात भावांनी कोरोनाचें संक्रमण जालें ना जाल्यार पांच दीस गणपतीची सेवा करपाची आंगवण केल्ली. आंगवण पावोवपा खातीर जमातीच्या भावांनी सगली तयारी केल्या.
निरंकाला वानरमारी जमातीचे भाव दर वर्सा एकठांय येवन गणपतीचें पुजन करतात. पूण ह्या वर्सा जमातीच्या लोकांनी 11 दिसांचो उत्सव मनोवपाचो निर्णय घेतिल्लो. ते खातीर एका देणगीदारान गणणपतीची आकर्शक मूर्त कोल्हापूरा सावन हाडल्या. मंगळारा व्हड उमेदीन गणपतीच्या मुर्तीचें पुजन केलें. संवसारांत महामारीचें संकश्ट कोसळ्ळें उपरांत वानरमारी जमातीच्या लोकां मदीं भिरांत पातळिल्ली. त्या वेळार जमातीच्या भावांनी कोरोना पसून सुटका मेळ्ळ्यार 11 दीस सेवा करपाची आंगवण गणपती कडन केल्ली. फाटल्या वर्सा आंगवण पावोवपा खातीर सगली तयारी पुराय केल्ली. पूण चवथीच्या दिसांनीच जमातीचो एक जाण्टो मनीस गंभीर दुयेंत पडिल्ल्यान गणपतीचें देड दिसां भितर विसर्जन केल्लें.
गणपतीचें पुजन करपी वानरमारी जमातीचे लोक शिक्षण नाशिल्ल्यान दनपारां आनी रातच्या वेळार स्पिकर लावन आरत्यो करतात. त्या वेळार सगलीं ल्हान-व्हड ताळयो वाजोवन आरत्यांचो लाव घेतात. हातूंत जमतीचीं बायलांय वांटो घेतात. कांय भुरगीं शिक्षण घेत आशिल्ल्यान फुडल्या कांय वर्सांनी आरत्यांचे धडे घेवपाची तयारी जमतीचे भाव करीत आसात. सरकारान वानरमारी जमातीच्या लोकांक हाचे पयलीं आधार कार्ड, रेशन कार्ड, मतदान कार्ड, शौचालय, रस्तो आनी नळाचें उदक उपलब्ध करून दिलां. उत्सवाच्या दिसांनी वानरमारी जमातीचीं बायलां एकठांय येवन जेवण करतात.
वानरमारी जमताीचो मुखेली गोपाळ पवार हांणी म्हायती दितना, आंगवण पावोवपा खातीर 11 दीस गणपतीची सेवा करपाचो निर्णय सगल्यांनी घेतला. कोरोना महामारी वेळार जमातीच्या लोकांक तो संक्रमीत जावचो न्हय म्हूण गणपती कडेन आंगवण केल्ली. ही आंगवण पावोवपा खातीर ह्या वर्सा सगली तयारी पुराय जाल्या. गणेश विसर्जनाच्या म्हणल्यार इकराव्या दिसा दनपारां 3 वरांचेर भव्य मिरवणूक काडटले अशें पवार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
