भांगरभूंय | प्रतिनिधी
7 म्हयन्यांत धाडले प्रस्ताव; पूण उत्तर गोंयांत संबंदितांची आडनदर
अपघात आडावपा खातीर येरादारी पुलिसांनी केल्ली सुचोवणी
पणजी: उत्तर गोंयांतले चडशे अपघात पेड्डेर रस्ते आनी अपघात आडावपा खातीर रस्त्यांचेर गरजेची ती उपाय येवजण करूंक नाशिल्ल्याचें उक्तडार आयलां. हे फाटभुंयेर, उत्तर गोंयांतल्या रस्त्यांचेर गरजेची ती उपाय येवजण करची अशी सुचोवणी करपी 743 प्रस्ताव फाटल्या सात म्हयन्यांत येरादारी पुलिसांनी भौशीक बांदकाम खातें तशेंच थळाव्या स्वराज्य संस्थांक सादर केल्यात. पूण संबंदितां कडल्यान ह्या प्रस्तावां कडेन आडनदर जायत आशिल्ल्यानूच अपघातांच्या प्रमाणांत वाड जायत आशिल्ल्याचें दिसून येता.
अंदूं वर्सा सुरवाते सावनूच गोंयांत रस्तो अपघातांनी व्हड प्रमाणांत वाड जायत आसा. दक्षीण गोंयचे तुळेन उत्तर गोंयांत अपघात आनी मरणांचे संख्येंत अदीक वाड जाल्या. हातूंतले चडशे अपघात पेड्डेर रस्ते आनी अपघात आडावपा खातीर पीडब्ल्यूडी, थळाव्यो पंचायती तशेंच पालिकां कडल्यान रस्त्यांचेर गरजेची ती उपाय येवजण करूंक नाशिल्ल्यानूच जाल्ल्याचें दिसून आयलां. पीडब्ल्यूडी, पंचायती आनी पालिकांनी हातूंत गंभीरतायेन लक्ष घालून पेड्डेर रस्त्यांची दुरुस्ती करची. रस्त्यांचेर गरज आसा थंय स्पीड ब्रेकर, डिव्हायडर, वाईडिनींग, क्रॅश बॅरियर तशेंच गतीची मर्यादा आडावपा खातीरच्यो उपाय येवजण्यो करच्यो. अश्यो 743 सुचोवण्यो गोंय येरादारी पुलिसांनी 1 जानेवारी ते 31 जुलय 2023 ह्या सात म्हयन्यांच्या काळांत केल्ल्याची म्हायती गोपां कडल्यान मेळ्ळ्या.
वाडटे अपघात आडावपा खातीर येरादारी पुलीस दिसा उजवाडा आनी रातच्या वेळारूय विवीध उपाय येवजण्यो आंखतात. तरी लेगीत अपघात आनी मरणांची संख्या वाडतूच आसा. वाडटे अपघात आडावपाची जापसालदारकी पुलिसां सयत पीडब्ल्यूडी आनी थळाव्या स्वराज्य संस्थांचीय आसा. पूण खूबश्यो पंचायतींची आनी पालिकांची आपआपल्या कार्यक्षेत्रांतल्या रस्त्यांचे बिकट परिस्थिती कडेन आडनदर जायत आसा. ताचो फटको वाहन चालकांक बसत आशिल्ल्यानूच येरादारी पुलिसांनी सेगीत प्रस्ताव सादर करून तांकां जागृत करपाचे यत्न सुरू आशिल्ल्याचेंय गोपांनी सांगलें.
खूबश्या प्रस्तावांक ‘कोयरा पेटी’
वाडटे अपघात आडावपा खातीर उत्तर गोंय पुलिसां कडल्यान सेगीत पीडब्ल्यूडी, पंचायती आनी पालिकांक जागे करपाचें काम सुरू आसलें तरी तांचे कडल्यान पुलिसांक जाय तसो प्रतिसाद मेळना. येरादारी पुलिसांनी आतां मेरेन 743 प्रस्ताव सादर केल्यात. तातूंतल्या खूबशा प्रस्तावांक ह्या संस्थांनी कोयराची पेटी दाखयिल्ल्याचें येरादारी पुलिसांतल्या एका वरिश्ठ अधिकाऱ्यान ‘भांगभूंय’ कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
