भांगरभूंय | प्रतिनिधी
रेल्वे सुरक्षा दळाची कामगिरी; तिकेट काळो बाजार प्रकरणांत 32 जाणांक अटक
भांगरभूंय । अजय लाड
मडगांव: मडगांव रेल्वे स्टेशनार कोंकण रेल्वे पुलिसां भशेनूच रेल्वे सुरक्षा दळाचे (आरपीएफ) पुलिसूय कायदो सुवेवस्था सांबाळपाचें काम करतात. मडगांवां रेल्वे सुरक्षा दळा कडल्यान ऑपरेशन ‘नन्हे फरिस्ते’ खाला 2019 सावन पांच वर्सांच्या काळांत घरांतल्यान पळून आयिल्ल्या तशेंच शेणिल्ल्या 116 भुरग्यांक पालकां मेरेन पावोवपाचें काम आपवावुरपी संस्थेच्या माध्यमांतल्यान केलां. तशेंच तिकेटींच्या काळोबाजार प्रकरणांत 32 जाणांक अटक केल्या.
कोंकण रेल्वे पुलिसां बगर रेल्वे स्टेशनार कायदो आनी सुवेवस्था सांबाळपा खातीर रेल्वे सुरक्षा दळाच्या पुलिसांक तैनात करतात. खूबशे फावटी रेल्वे सुरक्षा दळाच्या पुलिसांनी केल्ले कामगिरीचेर चड लक्ष दिनात. स्टेशनार शेणिल्ल्या भुरग्यांक सोदून तांकां पालकांचे वा आपवावुरपी संस्थेच्या ताब्यांत दिवप, प्रवासी बेकायदो ज्वलनशील पदार्थ वा सोरो व्हरत आसल्यार तांचेर कारवाय करप, खूबशे फावटी रेल्वेंत चडपाचे वा देंवपाचे गडबडींत प्रवासी सामान विसरून वतात. हें सामान परतून प्रवाशां मेरेन पावोवपाचें काम रेल्वे सुरक्षा दळा कडल्यान जाता. तशेंच रेल्वले तिकेटींचो काळो बाजार जावचो न्हय, हे खातीर दलालांचेर कारवाय करपाचें कामूय रेल्वे सुरक्षा दळाचे जवान करीत आसतात.
खूबशे फावटी रेल्वे पुलीस आनी रेल्वे सुरक्षा दळाच्या पुलिसांचे कामगिरी विशीं लोकांक खबरूच नासता. एकामेकांच्या सहकार्यान लोकांक सेवा दिवपाचें काम कोंकण रेल्वे पुलीस आनी रेल्वे सुरक्षा दळा कडल्यान जायत आसता.
रेल्वे सुरक्षा दळा कडल्यान रेल्वे स्टेशनार सांपडिल्ल्या भुरग्यांक आपवावुरपी संस्थांच्या ताब्यांत दिवन फुडली कारवाय करपाक सांगतात. वा पालकांचो सोद घेवन भुरग्यांक तांचे सुवादीन करतात. 2019 वर्सा 42 भुरग्यांक, 2020 वर्सा 11 भुरग्यांक, 2021 वर्सा 7 भुरग्यांक, 2022 वर्सा 36 भुरग्यांक जाल्यार ह्या वर्सा 20 ऑगस्ट मेरेन 20 भुरग्यांक रेल्वे स्टेशन आनी वाठारांतल्यान ताब्यांत घेवन भुरग्यांच्या पालकांच्या वा एनजीओच्या ताब्यांत दिवन परतून घरा धाडून दिल्यात.
31 लाखांचो सोरो जप्त; 83 जाणांचेर कारवाय
रेल्वे सुरक्षा दळान 2019 सावन आतां मेरेन 28,757 सोऱ्याच्यो बाटल्यो म्हणल्यार 31 लाख 56 हजार 950 रुपयांचो अवैध सोरो जप्त केला. ह्या प्रकरणांत 83 जाणांचेर कारवाय केल्या. 2019 वर्सा 20,53,738 रुपयांचो सोरो जप्त केला. तातूंत 26 जाणांक ताब्यांत घेतल्यात. 2020 वर्सा 5,24,423 रुपयांचो सोरो जप्त करून पांच जाणांचेर कारवाय केल्ली. 2021 वर्सा 3,20,489 रुपयांचो सोरो जप्त करून 18 जाणांचेर कारवाय केल्ली. 2022 वर्सा 1,29,150 रुपयांचो सोरो जप्त करून 17 जाणांचेर कारवाय केल्ली. जाल्यार अंदूं 2023 वर्सा ऑगस्ट मेरेन 1,29,000 रुपयांचो सोरो जप्त करून 17 जाणांचेर कारवाय केल्या.
दलालांचेर कारवाय; 16 लाखांचीं तिकेटी जप्त
2019 सावन तिकेटींचो काळो बाजार केल्ल्या प्रकरणांत रेल्वे सुरक्षा दळाच्या जवानांनी 32 प्रकरणां नोंद करून 32 जाणांक अटक केल्या. तिकेट काडपा खातीर वापरतात तें युझर्स आयडी, सॉफ्टवेर आनी तिकेटीय जप्त केल्यात. रेल्वे तिकेट काळो बाजाराची फाटल्या पांच वर्सांतली आंकडेवारी पळयत जाल्यार 32 प्रकरणांनी 32 जाणांक अटक केल्या. तांचे कडल्यान 16 लाख 60 हजार 814 रुपयांची 967 तिकेटी जप्त केल्यात.
ई तिकेटींचो काळाे बाजार
वर्स प्रकरणां अटक जप्त तिकेटी मोल
2019 14 13 370 6,49,215
2020 2 2 32 1,01,892
2021 4 4 70 83,037
2022 3 2 3 2,790
2023 9 11 492 8,23,880
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
