भांगरभूंय | प्रतिनिधी
वास्को, प्रतिनिधी: दाबोळी विमानतळ विस्तार येवजणे खाला संबंदीत सुविधा निर्माण करपा खातीर दाबोळी विमानतळ प्राधिकरण सुमार ७.६ एकर अतिरिक्त जमनी संबंदी मागणी सरकारा कडेन करतले अशें दाबोळी विमानतळ सल्लागार समितीचे अध्यक्ष खासदार फ्रान्सिस्को सार्दीन हांणी सांगलें. सरकारान ही जमीन दिल्यार दाबोळी विमानतळार जावपी गैर वेवस्था पयस जातली. प्रवाशांक बर्यो सुविधा मेळटल्यो, अशें तांणी स्पश्ट केलें.
दाबोळी सल्लागार समितीची बसका बिरेस्तारा जाली. ह्या वेळार सल्लागार समितीचे वांगडी तशेंच दाबोळी विमानतळाचे संचालक धनंजय राव हाजीर आशिल्ले. हे बसकेंत विवीध विशयांचेर चर्चा जाली. फाटले बसकेंत घेतिल्ल्या निर्णयांची अमलबजावणी जाल्या काय ना हे विशीं आढावो घेतलो.
हे बसके उपरांत खासदार सार्दीन हांणी म्हायती दितना दाबोळी विमानतळावयल्या सुविधां विशीं समाधान उक्तायलें. प्रवाशांक चडांत चड सुविधा दिवपाचे आमी यत्न करतात. दाबोळी विमानतळा वयल्या विमानसेवा संबंदीत एअरलायन्स कंपन्यांक मोपा व्हरचें न्हय अशी मागणी तांणी केली. पूण एअरलायन्स कंपन्यो खाजगी आशिल्ल्यान ते आपले वेवस्थे प्रमाण निर्णय घेतात. त्या एअरलायन्स कंपन्यांक बर्यो सुविधा दिवपा खातीर उबार दिवपाची गरज आसा. सरकारान दाबोळी विमानतळा वयले लँडींग चार्जीस सध्या उणे केल्यात. दाबोळी विमानतळाक सरकाराचें बरें सहकार्य मेळटा अशेंय तांणी म्हणलें.
फाटले बसकेंत जें निर्णय घेतिल्ले तांतले चडशे पुराय केल्यात. ताका लागन प्रवाशांक बर्यो सेवा मेळटात. येत्या जानेवारींत सल्लागार समितीची बसका जावपाची आसा. तेन्ना परत आढावो घेतले अशें तांणी सांगलें.
दाबोळी विमानतळार पार्कींग वेवस्था नाशिल्ल्यान प्रवाशांक त्रास सोंसचो पडटात. ताची रोखडीच पुरवण जातली. दाबोळी विमानतळ वाठारांत पार्कींग इमारत बांदल्या. पूण कांय कारणांक लागून ती वापरी नासतना दवरल्या. ते संबंदी विचारलें तेन्ना बेगीनूच ते विशीं निर्णय घेतले, अशें तांणी स्पश्ट केलें.
दाबोळी विमानतळ पुलीस स्टेशनांत कर्मचारी उणे आसात. हे विशीं योग्य उपाय काडपा खातीर आपणें उपअधीक्षकां कडेन चर्चा केल्ल्याचें अशें सार्दीन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
