पर्रा अपघातांत एकल्याक मरण
भांगरभूंय | प्रतिनिधी
म्हापशें, प्रतिनिधी ः पर्रा दुचाकी गटारांत कोसळून जाल्ल्या अपघातांत ताहीर शाहीद खान (२८, गंगानगर, खोर्ली) ह्या तरणाट्याक मरण आयलें. ही घडणूक आयज फांतोडेर सुमार ५ वरांचेर घडली.
ताहीर खान हो जीए ०३ एएन ७३२८ क्रमांकाचे फसिनो दुचाकी वयल्यान साळगांवच्यान म्हापशेंचे दिकेन वतालो. वाटेक पर्राच्या हार्मोनी हॉलाच्या लागसाराक ताचें दुचाकी वयल्यान नियंत्रण सुटलें आनी ती चुकीचे दिकेन वचून गटारांत पडली. ह्या अपघातांत ताहीर गंभीर जखमी जालो आनी थंयच ताका मरण आयलें.
म्हापशं जिल्हो हॉस्पिटलांत व्हेल्या उपरांत दोतोरांनी ताका मरण आयिल्ल्याचें सांगलें. अपघाताचो पंचनामो म्हापशें पुलीस उपनिरीक्षक रिचा भोंसले आनी हवालदार उमेश नायक हांणी केलो.
मजगतीं, ताहीर खान हो पर्यटक टॅक्सी चालक आशिल्लो. कामा वयल्यान घरा येतना ताका अपघातांत मरण आयलें. ताचो दोळो लागिल्ल्यान हो अपघात घडलो, अशी शक्यताय पुलिसांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
