भांगरभूंय | प्रतिनिधी
एकट्या चोराक धरपाक येस
बातमीदार, हरमल: हरमला दोन देवळां आनी एका खुरसा कडली फंडपेटी फोडली. एका चोराक धरपाक नागरिकांक येस आयलें. हे चोरयेंत व्हड गँगाचो आसपाव आशिल्ल्याची शक्यताय आसा. सिसीटीव्हीक लागून चोरी जाता हें दिसून आयलें. पुलीस फुडलो तपास करतात.
बामणभाटीच्या श्री काशीकल्याण देवळांत रातचें सुमार १२ वरांचेर एकल्यान मुखेल दारांतल्यान प्रवेश केलो. उपरांत देवळाची फंडपेटी तांणी मुखेल दारा मेरेन हाडपाक येस मेळयलें. कोण पळयता जाल्यार पळोवपा खातीर तो देवळा भायर आयलो तेन्ना आयतो लोकांचे तावडेक सांपडलो. ह्या देवळाच्या लागसारा रावपी नागरिकांक चोरी जाल्ल्याचें कळटांत बोवाळ केलो आनी चोर हाताक मेळ्ळो.
मजगतीं, टेकडी हांगच्या श्री गिरोबा देवळांतली फंडपेटी उघडपाचो यत्न अपेशी थारलो. पूण एका खुरसाकडली फंडपेटी उगडून सुमार ४० हजार रुपयांची चोरी जाल्ल्याचो दुबाव नागरिकांनी उक्तायला.
मजगतीं, चोरयेच्या गुन्यांवा खाला धरिल्ल्या चोरान आपलो गुन्यांव कबूल करूंक ना. ह्या प्रकरणांत चार जाणांची गँग आशिल्ल्याची शक्यताय आसा. सकयलोवाडो श्री नारायण देव मंदिरांतूय ह्याच चोरांचो हात आशिल्ल्याची शक्यताय न्हयकारूं येना.
बामणभाटी देवळांतल्या सीसीटीव्हीक लागून चोरांक धरपाक येस मेळ्ळें. आतां हेर चोरां मेरेन पावपाक पुलिसांक सोंपे पडटलें.
पेडणें पुलिसांनी रातच्या वेळार पुलीस गस्त वाडोवची आनी तपासणी पंगडाची नेमणूक करची अशी मागणी ग्रामस्थ करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
