भांगरभूंय | प्रतिनिधी
पणजी, प्रतिनिधी ः उजो पालोवपी दळान 1 जानेवारी ते 15 सप्टेंबर ह्या साडे आठ म्हयन्यांत 104 जाणांचो जीव वाटायलो. उजो आनी हेर आणीबाणीच्या वेळार 76 जाणांक मरण आयलां. ह्या काळांत दळाक वट्ट 7431 फोन आयले अशी म्हायती दळाच्या वरिश्ठ अधिकाऱ्यांनी दिली.
ह्या काळांत वेगवेगळ्या आणीबाणीच्या वेळार सुमार 6 कोटी मोलाच्या मालमत्तेचें लुकसाण जालें. 16 कोटी 98 लाख रुपया मोलाची मालमत्ता वाटोवपाक ह्या दळाक येस आयलें. हाचे भायर ह्या दळान 429 जनावरांक वाटायले. जाल्यार वेगवेगळ्या घडणुकांनी 29 जनावरांक मरण आयलें.
उजो पालोवपी दळाक आयिल्ल्या 7431 फोनातले 3,757 फोन उजो पालोवपी दळा कडेन संबंदीत आशिल्ले, हेर आणीबाणी 1346, पावस वा हवामानाचे 2295, उदका संबंदीत 13 आनी हेर कारणां खातीर 20 फोन आयले. वट्ट फोनांतल्यान फोंडा सेंटरांत 744 कॉल आयल्यात, म्हापशा 714 आनी पेडणें 561 फोन आयले.
दळाक पावस संबंदीत 2,295 फोना मदीं सगळ्यांत चड 964 फोन रस्त्यांचेर पडपी झाडां खातीर आशिल्ले. वीज लायनीचेर झाडां पडपा विशीं 433 आनी निवासी घरांचेर झाडां पडपा विशीं 528 फोन आयले. ह्या 2,295 मदले चडांत चड 190 फोन पेडणें तालुक्याचे आशिल्ले. ते उपरांत 187 कॉल आयले.
चडशे कॉल बार्देशांतल्यान
तालुक्यांच्या आंकडेवारी प्रमाण, 7,431 फोनांतल्यान बार्देश तालुक्यांतल्यान सगळ्यांत चड 1,305 फोन आयिल्ले. तातूंतले 761 उज्या कडेन संबंदीत आशिल्ले. ते उपरांत साश्टींत 1051, तिसवाडींत 1013, फोंड्यांत 981 आनी दिवचल तालुक्यांत 598 फोन आयिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
