भांगरभूंय | प्रतिनिधी
पेडणें, प्रतिनिधी : भौशीक बांदकाम खाते कितलें जागृत आसा हाची एक देख म्हळ्यार पेडणे तालुक्याच्या गांवांतले रस्ते. रस्त्यांचे भिरांकूळ स्थितीक वीज खातें जापसालदार आसात. आनी ताका भौशीक बांदकाम खात्याचो पुराय आदार आसा.
मोरजी पंचायत वाठारांतल्या नारोजीवाडो, मदलो वाडो, गावडे वाडो हांगा रस्त्यार उदक साठोवन रस्त्याची वायट वेवस्था वायट जालां. ह्या आडमेळ्यांक सामकार वचून लोकांक बाप्पाक घरा हाडचें पडलें. आयज चवथींच्या उत्सवांत लेगीत लोकांक योग्य रस्ते मेळूंक नात.
रस्ते दुरुस्त करपाची मागणी करुन लेगीत हाचे कडेन दुर्लक्ष जाता. जमनी पोंदा वीज केबल घालतना नागरिकांनी विरोध केलो ना. लोकसेवेची गजाल म्हणून लोक ओगी रावले, पूण आतां ताचो परिणाम लोकांक सोंसचो पडटा. नारोजीवाडो, मदलो वाडो, गावडे वाडो रस्तो उदकान भरलां. ताका जापसालदार कोण ? ताचीं कारणां कितें? बांदकाम साहित्य रस्त्या कुशीक दवरप, गाडयो रस्त्या कुशीक उब्यो दवरप, योग्य पार्किंग करपाक सुवात ना, देखून उदक वचपाच्यो वाटो बंद जाल्यात.
रस्त्यांचेर जमिल्लें उदक काडपा खातीर भौशीक बांदकाम खात्यान कसलेच उपाय करूंक नात. रस्त्यांचेर आशिल्ल्या खड्ड्यांत माती आनी फातर घालून रस्ते चड धोक्याचे स्थितींत करपाचें काम पूण भौशीक बांदकाम खात्यान केलां. रस्त्या कुशीक बांदकामाक लागून गटाराची अवस्था कितें आसतली? फुडाराक इमारतींत येवपी, दुकांनानी येवपी गिरायक आपलीं वाहनां खंय उबीं करतले? हो एक व्हडलो प्रस्न आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
