भांगरभूंय | प्रतिनिधी
फोंडें, प्रतिनिधी : आंबे-दाबाळ गांवांक जोडपी पांयपूल उबारून देड वर्सां उलगलीं तरी आजूनय जोड रस्तो करूंक नाशिल्ल्यान ग्रामस्थांनी तिडक उक्तायल्या. पांयपुलाक लागून जीव मुठींत घेवन व्होड्यान केल्लो प्रवास बंद जाला. गांवच्या लोकां खातीर न्हंयेचेर पांयपूल उबारल्यार ५ दीस गणेशाची सेवा करपाची आंगवण फेडपा खातीर ग्रामस्थ सज्ज जाल्यात. पूण आजूनय पांय पुलाचो बरो वापर करपाक मेळनाशिल्ल्यान थळावे तिडक उक्तायतात.
दाबाळ गांवांतल्यान एका उल्याच्या अंतराचेर आशिल्ल्या आंबे गांवांत वचपा खातीर दूदसागर न्हंय हुपची पडटाली. पावसांत ग्रामस्थांक व्हड्यांतल्यान प्रवास करचो पडटालो. जीव मुठींत घेवन प्रवास करचो पडिल्ल्यान पावसांत ल्हान भुरग्यांक दाबाळ हांगचे शाळेंत धाडिनासले. जाल्यार कांय जाणां भुरग्यांक शिक्षणा खातीर सोयर्यांच्या घरा दवरताले. ताका लागून ग्रामस्थ न्हंयचेर पांय पूल बांदपाची मागणी सरकारा कडेन करताले. पांयपूल बांदून दिल्यार गणपतीची ५ दीस सेवा करपाची आंगवण ग्रामस्थांनी केल्ली. ग्रामस्थांचे मागणेची दखल घेवन सरकारान सुमार १० कोटी रुपया खर्च करून पांयपूल उबारला. २० मे २०२२ दिसा उक्तावण जालें. तेन्ना राजकी फुडार्यांनी डिसेंबर २०२२ मेरेन दोनूय वटेन पांयपुलाक जोड रस्तो उबारून दिवपाचें आस्वासन ग्रामस्थांक केल्लें. पूण जोड रस्तो तयार करपाची प्रक्रिया आजून सुरु करूंक ना. मुख्यमंत्री प्रमोद सावंत हांणी हे विशीं लक्ष घालून पांयपूल उभारपाची मागणी ग्रामस्थ करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
