भांगरभूंय | प्रतिनिधी
नेहरू, इंदिरा गांधी हांची केली तोखणाय
नवी दिल्ली, खबरां संस्था: सोमारा आदले संसदेतल्या संसदीय कामकाजाचो निमाणो दीस. मंगळारा सावन म्हळ्यार 19 सप्टेंबर सावन संसदेचें कामकाज नव्या संसद भवनांत जातलें. आदले इमारतींत प्रधानमंत्री मोदींनी 50 मिनटांचें निमाणें भाशण केलें.
ह्या वेळार प्रधानमंत्र्यानी आदल्या प्रधानमंत्र्यांची याद केली. तांणी म्हणलें, हें अशें सदन जंय पंडित नेहरूंच्या स्टोक्स ऑफ मिडनायटची प्रतिध्वनी आमकां सगळ्यांक उर्बा दिता. ह्या सदनान इंदिरा गांधींच्या नेतृत्वा खाला केल्ली बांगलादेश मुक्तिसंग्रामाची चळवळूय पळयली.
स्वातंत्र्या उपरांत हे इमारतीक संसद भवन म्हणून मान्यताय मेळ्ळी. ही इमारत बांदपाचो निर्णय परकी राज्यकर्त्यांचो आशिल्लो. ही वास्तू बांदपाक म्हज्या देशवासीयांचो घाम आनी कश्ट लाभले, हें आमी अभिमानान सांगपाक शकतात. तशेंच पयसोय म्हज्या देशांतल्या लोकांचोच आशिल्लो, अशें प्रधानमंत्र्यानी फुडें म्हणलें.
मजगतीं, केंद्र सरकारान 18 ते 22 सप्टेंबराक विशेश अधिवेशन आपयलां. ह्या विशेश अधिवेशनांत पांच बसका जातल्यो. ह्या काळांत चार विधेयकां मांडटले. तशेंच दुसरे वटेन विरोधी पक्षांनी सरकाराक प्रस्न करपा खातीर 9 मुद्यांची वळेरी तयार केल्या. ह्या अधिवेशनांत I.N.D.I.A. तले 24 पक्ष वांटेकार जातले.
७५०० परस चड प्रतिनिधी
सुरवातेक बायलां वांगड्यांचो आंकडो उणो आशिल्लो. ल्हव ल्हव तांचो आंकडो वाडतूच गेलो. स्थापने सावन आतां मेरेन 7500 परस चड प्रतिनिधी दोनूय सभाघरांनी आयल्यात. ह्या काळांत सुमार 600 बायलां खासदार आसात. इंद्रजीत गुप्ता हे 43 वर्सां सदनाचे साक्षीदार आशिल्ले. शफीकुर रहमान 93 वर्सां पिरायेचेर सभाघरांत येतात.
संसदेचेर आतंकवादी हल्लो
लोकशायेच्या घराचेर आतंकवादी हल्लो जालो. हो हल्लो इमारतीचेर न्हय तर आमच्या आत्म्याचेर जालो. ही घडणूक हो देश केन्नाच विसरूंक शकना. आतंकवाद्यां कडेन झुजतना आमची राखण करपी सुरक्षा कर्मचारी केन्नाच विसरचे नात.
पत्रकार इश्ट आनी पत्रकारिता
आयज आमी ह्या सभाघरांतल्यान भायर सरतना संसदेचेर रिपोर्टींग करीत रावपी त्या पत्रकार इश्टांचोय उगडास करपाक जाय. कांय जाण आसात, जांणी आपलें पुराय जिवीत संसदेक दिलां. पयलीं हें तंत्रगिन्यान नाशिल्लें, तेन्ना हेच लोक आशिल्ले. ताची तांक म्हळ्यार ते भितरली खबर आनी भितरले भितरलीय खबर लोकां मेरेन पावयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
