भांगरभूंय | प्रतिनिधी
केपें: कुडचड्यार श्रीमती चंद्रभागा तुकोबा नायक उच्च माध्यमीक विद्यालयांत चवथीचो बाजार आयोजीत केला. चवथीच्या बाजाराचें उक्तावण कुडचडें काकोडें नगरपालिकेचे नगराध्यक्ष प्रदीप नायक, संस्थेचे अध्यक्ष अशोक नायक आनी पालक शिक्षक संघाचे अध्यक्ष रुपेश नायक हांचे हस्तुकीं केलें.
ह्या वेळार संस्थेचे भांडारी योगेश नायक, संस्थेचे वांगडी सगूण नायक, पालक शिक्षक संघाची वांगडी दयाली वस्त, प्रभारी प्राचार्या सुगंधा भट, प्रभारी उपप्राचार्य व्यंकटेश नायक, वरिश्ठ शिक्षिका मनीषा उपाध्ये हाजीर आशिल्ल्यो.
दिवली पेटोवन कार्यावळीची सुरवात जाली. विद्यालयाची वरिश्ठ शिक्षिका मनीषा उपाध्ये हांणी हाजीर आशिल्ल्यांक येवकार दिलो. विद्यालयांत गणपतीच्या प्रतिमेचें पुजन केलें. विद्यार्थ्यांनी भक्तीभावान आरत्यो म्हणल्यो. नाच, फुगड्यो घाल्यो.
गणपती म्हणल्यार ल्हान, व्हडांचो देव. चवथ उत्साहान आनी आनंदान दर वर्सा मनयतात. गणेशोत्सव हो आपले सांस्कृतीक जडणघडणीचो एक म्हत्वाचो भाग आसा. ह्या सणांतल्यान आपली संस्कृती आनी परंपराचो सांबाळ जावपा हेतान तशेंच विद्यार्थ्यांक प्रोत्साहन दिवपा खातीर आनी बाजारांतले विक्रीचें ज्ञान दिवपा खातीर हो उपक्रम पयलेच फावटी विद्यालयांत आयोजीत केला अशें नगराध्यक्ष तशेंच शिक्षक प्रदीप नायक हांणी सांगलें.
संस्थेचे अध्यक्ष अशोक नायक हांणी सगल्यांक चवथीची परबीं भेटयली आनी असो उपक्रम राबयिल्ले खातीर शिक्षकांचे आनी विद्यार्थ्यांचें अभिनंदन केलें.
विद्यालयाची संस्कृतीक अध्यक्षा शिक्षिका सिद्धी नायक हांणी चवथीच्या बाजाराचे प्रक्रिये संबंदी आपले मत उक्तायलें.
रानांत मेळपी विवीध रानफळां, वेगळींवेगळीं पत्री, भाज्यो, केळीचीं पानां, हळडीचीं पानां, अंबाडे, तवशीं, सुपारी, आंब्याचीं पानां, नेवर्यो, मिठायेचे पदार्थ, सजावटीचें साहित्य, वस्त्र, वाती, मनरिजवण आनी हेर खाद्यपदार्थ विद्यार्थ्यांनी तयार करून हाडिल्ले. ह्या उपक्रमांत विद्यार्थ्यांनी व्हड उत्साहान वांटो घेतलो.
पालकांनी आनी शिक्षकांनी वस्तूंची खरेदी केली. विद्यार्थ्यांनी प्रत्यक्ष बाजाराचो अणभव घेतलो.
कार्यावळीचें सुत्रसंचालन शिक्षिका वृक्षा करमली हांणी केलें जाल्यार उपकार उपप्राचार्य व्यंकटेश नायक हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
