भांगरभूंय | प्रतिनिधी
पणजी: मुख्यमंत्री डॉ. प्रमोद सावंत हांच्या 50 व्या वाडदिसाचें औचित्य सादून भाजप युवा मोर्चान सुमार 16 लाख रुपया खर्च करून गोंयांतल्या चार कुटुंबांक घरां बांदून दिवपाचें जाहीर केल्लें. तातूंतले हसापूर-पेडण्यां घर बांदून पुराय जालां.
24 एप्रील 2023 दिसा मुख्यमंत्री डॉ. प्रमोद सावंत हांचो 50 वो वाडदीस व्हड उमेदीन मनयलो. ते निमतान गोंयांतल्या भाजप मंडळांनी विवीध कार्यावळींचेंय आयोजन केल्लें. हेंच औचित्य सादून भाजप युवा मोर्चान विजया मळीक (हसापूर-पेडणें), सदा मांद्रेंकार (गांवकरवाडो-दिवचल), दिलखूश रायकार (चापोली-काणकोण) आनी गणेश गांवकार (खुरपें-सांगें) ह्या चार गरजू कुंटुंबांक स्वताच्या खर्चान घरां बांदून दिवपाचो निर्णय घेवन कामूय सुरू केल्लें. तातूंतलें विजया मळीक हांच्या घराचें काम पुराय जालां.
मजगतीं, मोर्चाच्या पदाधिकाऱ्यांनी स्वता निधी जमा एकठांय करून ह्या घरांच्या बांदणीचें काम सुरू केल्लें. सुरवातेक दरेक घरा खातीर दोन लाख रुपया खर्च करपाचें थारायिल्लें. पूण उपरांत काम वाडत गेल्ल्यान चारूय घरांचेर सुमार 16 लाख रुपयांचो खर्च येतलो अशें भाजपयुमोचे अध्यक्ष समीर मांद्रेंकार हांणी स्पश्ट केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
