भांगरभूंय | प्रतिनिधी
मळकर्णें-केपेंची धूव आनी मुंबयची आदली आशिल्ली नगरसेविका
काकोडें: मुंबय म्हानगरपालिकेच्यो शिवसेनेच्यो आदल्यो नगरसेविका, ज्येश्ठ शिवसैनीक आनी मळकर्णें, केपेंची धूव श्रीमती गीता विष्णू प्रभू खानोलकार (78) हांकां बिरेस्तारा 14 वेर रातीं जाण्टेपणांत थोड्या तेंपाच्या दुयेंसान मुंबयच्या हॉस्पिटलांत मरण आयलें. निमाणे संस्कार 15 वेर केले.
केपें म्हालांतल्या मळकर्णें गांवांत जल्म घेतिल्ल्या गीता खानोलकार हांणी, मूळ खानोली-वेंगुर्लें (सिंधुदुर्ग) हांगाचे मुंबयचे नामनेचे गिरीणी कामगार विष्णू प्रभू खानोलकार हांचे कडेन तांचे लग्न जाल्लें. लग्ना उपरांत बोरिवली प्रभागांतल्यान मुंबय महानगरपालिकेचेर नगरसेवक म्हूण त्यो वेंचून आयिल्ल्यो. मुंबयचे उदरगतींत तांणी म्हत्वाचें योगदान दिल्लें.
शिवसेना मुखेली बाळासाहेब ठाकरे हांच्या सामक्या लागींच्या विस्वासू, निश्ठावंत आनी प्रामाणीक कार्यकर्त्यां मदीं तांणी आपली वेगळी वळख निर्माण केल्ली. तांणी मुंबय म्हानगरपालिकेच्या बायलां आनी भुरगीं उदरगत समितीची अध्यक्ष म्हूण लेगीत येसस्वी रितीन जापसालदारकी पार पाडिल्ली. शिवसेनेच्या खंयच्याय आंदोलनांत त्यो मुखार आसताल्यो.
स्वातंत्र्या पयलींच्या काळांत गांवांत जेन्ना शिक्षणाची सोय नाशिल्ली त्या काळांत गांवांतल्या भुरग्यांक शिक्षणाचे धडे दिवपाचें कार्य लेगीत तांणी केल्लें. मळकर्णेंचे सर्गेस्त नागेश आनी कमलाताई सामंत हांची ती व्हडली धूव. तशेंच निवृत्त शिक्षक आनी ज्येश्ठ पत्रकार श्रीपाद सामंत हांची व्हडली भयण. तांचे फाटल्यान तीन लग्न जाल्ल्यो धुवो, जांवय, नातरां, देर, जावो, पांच भयणी असो मोटो घराबो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
