भांगरभूंय | प्रतिनिधी
रस्त्या वयलें ओल्त थारलां धोक्याचें
फोंडें, प्रतिनिधी: बांदोडेंच्या उड्डाण पुला वयल्या ओल्ताचेर आयतारा सकाळीं ११.३० वरांचेर चालकाचें नियंत्रण सुटिल्ल्यान क्रेनीचो धपको फुडल्यान येवपी काँक्रिट मिक्सर वाहनाक बसून क्रेन चालक मिथुन कुमार साह (३२, फर्मागुडी) हो गंभीर जखमी जालो. अपघातांत मिक्सर चालक बापू (३०, महाराष्ट्र) होय जखमी जालो. शिरोड्यां अपघात जाल्ले कदंब बसीक काडपाक वतना हो अपघात जालो.
कदंब बसीक काडपा खातीर फर्मागुडयेरच्यान एनएल – ०१- एल – ५८२८ क्रमांकाची क्रेन वताली. बांदोडेंच्या उड्डाण पुलार चालकाचें नियंत्रण गेल्ल्यान क्रेन सरळ रस्त्याचे दुसरे वटेन गेली. तेन्ना ढवळीच्यान फर्मागुडयेर वचपी काँक्रिट मिक्सर वाहनाक क्रेनीन धपको दिलो. लोकांनी क्रेन चालकाक भायर काडून उपजिल्हो हॉस्टिपलांत दाखल केलो. गंभीर जखमी जाल्ल्यान क्रेन चालकाक गोमॅकोंत दाखल केला. फोंडेंचे पुलीस हवालदार देविदास पर्येकार हांणी अपघाताचो पंचनामो केलो.
बांदोडें अपघात घडिल्ले सुवातेर ह्यान पयलींय ५ परस चड अपघात घडल्या. फर्मागुडयेरच्या ढवळेचे दिकेन वचपी वाहनांक धोको निर्माण करपी ओल्तार पावले उपरांत चालकाचें नियंत्रण वचून अपघात जातात. फाटल्या कितल्याशाच वर्सां सावन हें ओल्त काडपाची मागणी थळावे लोक करतात. पूण बांदकाम खात्यान हाचे कडेन आडनदर केल्ल्याचें दिसता. ताका लागून फुडाराक हे सुवातेर व्हड अपघात घडपाची शक्यताय न्हयकारूं येना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
