भांगरभूंय | प्रतिनिधी
फोंडें, प्रतिनिधी: तोर्ल – शिरोडेंच्या अशीर रस्त्याचेर आयतारा सकाळीं सुमार ७.१५ वरांचेर कदंबा बसीन एका झाडाक धपको दिलो. हातूंत ११ प्रवासी जखमी जाले. अपघातांत जखमी जाल्ली सुचिता गांवकार (४०, पाज -शिरोडें) हिका उपचारा खातीर गोमेकोंत व्हेल्या. जाल्यार बस चालक राघोबा नायक (५४, भाटी ), बस वाहक गुणा गांवकार (५७, बोरी) येसू वेळीप (६५, पाज -शिरोडें), सुनीता गांवकार (४३), चंद्रिका गांवकार (४१), सुलक्षा गांवकार (४५), अनिशा वेळीप (५२, सगळे बिबळ- शिरोडें) हांकां उपचारा खातीर मडगांवच्या हॉस्पिटलांत व्हेल्यांत. किरकोळ जखम जाल्ल्या हेर तीग जाणांक शिरोडें मुळाव्या भलायकी केंद्रांत उपचार करून घरा धाडलीं.
मेळिल्ले म्हायती प्रमाण, जीए ०१-एक्स – ४१४ क्रमांकाची कदंब बस आयतारा सकाळीं बिबळ गांवांतल्यान फोंड्यां वताली. तोर्ल- शिरोडेंच्या वोल्ताचेर कदंब बसीचें स्टेरींग रोड तुटिल्ल्यान बसीन रस्त्याच्या कुशीक आशिल्ल्या आम्याच्या झाडाक धपको दिलो. हातूंत बसींतले प्रवासी जखमी जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
