भांगरभूंय | प्रतिनिधी
पणजी, प्रतिनिधी: मुखार वचपी व्हडल्या कंटेनराक ओव्हरटेक करपी वॅगनर टॅक्सीन (जीए ०७, एफ ३९९०) कुशीक पार्क केल्ल्या ट्रकाक धपको दिल्ल्यान कार चालक संतोष हरिजन (बेती, मूळ कर्नाटक) हाका जाग्यारूच मरण आयलें. आयज फांतोडेर ३ वरांचेर पर्वरीच्या पेट्रोल पंपा मुखार ही घडणूक घडली. कंटेनराक ओवरटेक करतना खूब वेगान आशिल्ल्या वाहनचालकाचें वाहना वयलें नियंत्रण वचून हो अपघात जाला आसतलो, अशें पुलिसांनी सांगलें.
ट्रकाक धपको बसले उपरांत जाल्ल्या आवाजान लागींचे लोक, रस्त्या वयल्यान वचपी वाहनचालकांनी बेगोबेग पुलिसांक आपयले. टॅक्सीची स्थिती पळयत जाल्यार हो धपको खूबच नेटान बसला आसतलो, अशें थळाव्यांनी सांगलें.
कांय म्हयन्यां सावन राज्यांत सुरू आशिल्ल्या अपघातांचें सत्र चालूच आसा. कांय दिसां पयलीं पर्वरी हांगा नेक्सॉन गाडयेक अपघात जावन गाडयेंत आशिल्ल्या तिगांक मरण आयिल्लें. राज्यांत रुंद केल्ल्या सगल्याच रस्त्यां कुशीक रातच्या वेळार वाहनां पार्क करून दवरतात. रस्त्यार लायट नासल्यार कांय वेळार कुशीक गाडी आसा तें दिसना. बऱ्याच वाठारांनी स्ट्रीट लायटूय बंद आसता, अशें वाहनचालकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
