भांगरभूंय | प्रतिनिधी
उपाय करीना जाल्यार कायदो हातांत घेतले, ट्रॅक्सीकारांची शिटकावणी
मडगांव, प्रतिनिधी : बाणावलींतल्या गोवा मायल्स टॅक्सी आनी थळाव्या टॅक्सी चालकां मदलो वाद वाडपाचीं शक्यताय आसा. बाणावलींत पर्यटकांक घेवन येवपी गोवा मायल्स टॅक्सी चालक बुकींग करिनासतना लेगीत हॉटेलाच्या वाठारांत उबे आसात. हाका लागून थळाव्या टॅक्सी चालकांक लुकसाण जावपाक लागलां. सरकारी पांवड्यार उपाय करचे, नाजाल्यार कायदो हातांत घेतले अशी शिटकावणी थळाव्या टॅक्सी चालकांनी दिल्या.
गोंय मायल्स टॅक्सी संबंदी थळाव्या टॅक्सी चालकांक आनी बाणावलीच्या मालकांक कांय समस्या आशिल्ल्यान गोवा मायल्स अधिकाऱ्यां आनी थळाव्या टॅक्सी चालकां मदीं कोलवा पुलीस स्टेशनाचेर बसका जाली. ह्या वेळार आमदार वेंझी व्हिएगश, सरपंच डिक्सन वाझ आनी थळावे टॅक्सी चालक हाजीर आशिल्ले. पुलीस निरिक्षक थेरन डिकॉस्टा हांकां थळाव्या टॅक्सी चालकांनी गोंय मायल्सांतले चालक पर्यटकांक बुकींग नासतना लेगीत सेवा दिवपाचें काम करतात अशें सांगलें. गोवा मायल्स टॅक्सी चालक बाणावली वाठारांतल्या हॉटेलांनी पर्यटकांक सोडटात. तांचें बुकींग थंयच सोंपता. आनी उपरांत हॉटेलाच्या पार्किंगांत वा रस्त्या कुशीक गाडयो उब्यो करतात. हाचे वयल्यान थळाव्या टॅक्सी चालकांक मेळटलें तें भाडें गोवा मायल्स टॅक्सी चालक घेतात अशेंय सांगलें.
थळाव्या लोकांच्यो गाडयो अॅपांत घेवन डिजिटल वेवसाय करचो अशी सध्या विनवणी केल्या, पूण हाचेर उपाय केलो ना जाल्यार ते आंदोलन निश्चीत करतले अशें आमदार व्हेंझी व्हिएगासान सांगलें. गोवा मायल्स ऑपरेटिंग अधिकारी विमल प्रभुदेसाय हांणी थळाव्या टॅक्सी चालकांचें म्हणणें आयकून घेतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
