मौन बाळगुपी लेखक समाजाक घातक : मावजो
भांगरभूंय | प्रतिनिधी
पुण्यां जालें दोन ग्रंथाचें प्रकाशन
पुणें, खबरां संस्था : आयच्या लेखकांनी मौन बाळगुपाची वृत्ती आंगांत केळोवचीं न्हय. ती स्वताचे भलायके खातीर बरी आसत, पूण समाजाचे भलायके खातीर मात्तूय योग्य न्हय, असो सल्लो ज्ञानपीठकार दामोदर मावजो हांणी दिलो. फायटर जाले बगर कोण रायटर जावंक शकना. अभिव्यक्ती स्वातंत्र्य जपपा खातीर आमी सगल्यांनी यत्न करपाक जाय. घडटां तें पळयत ओगी बसून रावप, साहित्यीक समाजा खातीर घातक आसतात, अशेंय तांणी सांगलें.
पिंपरी- पुणेंच्या डॉ. डी. वाय. पाटील विद्यापीठा वतीन आयोजित 89 व्या मराठी साहित्य संमेलनाचेर आनी जागतिक मराठी संमेलनाचेर आदारित ‘साहित्य संचित’ आनी ‘शोध मराठी मनाचा 2023’ ह्या दोन ग्रंथांचे प्रकाशन हालींच डॉ. विद्यापीठाच्या सभागृहात ज्ञानपीठकार दामोदर मावजो हांचे हस्तुकीं जालें. ह्या वेळार आदले केंद्रीय गृहमंत्री सुशिलकुमार शिंदे विशेश मानेस्त म्हूण हजर आशिल्ले. अध्यक्षस्थानार विद्यापीठाचे कुलपती डॉ. पी. डी. पाटील आशिल्ले. जागतिक मराठी अकादमीचे अध्यक्ष रामदास फुटाणे आनी आदले केंद्रीय कायदोमंत्री अॅड. रमाकांत खलप, विद्यापीठाची विश्वस्त डॉ. स्मिता जाधव, कुलगुरू डॉ. एन. जे. पवार मुखेल सोयरे म्हूण उपस्थित आशिल्ले.
दामोदर मावजो हांणी सांगलें, ‘भाशा ही एकमेकांक जोडपी दुवो. कोंकणी आनी मराठी भाशा हांचे अद्वैत आसा अशें तांणी सांगलें. शिक्षण आनी साहित्य हांचो सामको लागींचो संबंद. हाचो मिलाफ पाटील हांणी घडोवन हाडलो. म्हाविद्यालयीन शिक्षणांत ‘साहित्य’ हो विशय सक्तीचो करपाक जाय. सध्या तंत्रज्ञान नेटान बदल आसा. ताची साहित्य विश्वा कडेन सांगड घालून तें नवे पिळगे मुखार मांडपाक जाय. तरणाटे पिळगेक आवडटलें, अशें साहित्य निर्माण करपाक जाय. समाजांत जे बदल जातात, ते तातूंत प्रतिबिंबित जावपाक जाय.’
सगल्या भाशांचें एक संमेलन जावचें : खलप
संवसारांतल्यो साबार भाशा नश्ट जावपाक लागल्यात. तातूंत भारतीय भाशांचोय आसपाव आसा. आधुनिक संवसाराची नव्यान खंयची भाशा तयार जातली, हाचो नेम ना. कोंकणी- मराठी भाशा आनी हेर बोली भाशांचें मेळून एक संमेलन जावपाक जाय, अशें मत रमाकांत खलप हांणी उक्तायलें.
सुशीलकुमार शिंदे हांणी सांगलें, समाज सुदारपाक जाय. तरणाट्यांनी अंधश्रद्धे कडेन वचनासतना नव्या विचारां कडेन वळपाक जाय. त्या मळाचेर काम करपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
