भांगरभूंय | प्रतिनिधी
उसगांव-गांजे पंचायत वाठारांतली घडणूक
35 ते 40 घर धनयांक लाखांनी रुपयांचें लुकसाण
फोंडें: उसगांव-गांजे पंचायत वाठारांतल्या साईनगरांत बिरेस्तारा सांजवेळा 6.30 वरांच्या सुमाराक विजेचो दाब वाडिल्ल्यान खूबशा घरांतली विजेचेर चलपी यंत्रणां लासून गेलीं. ताका लागून अदमाशेक 35 ते 40 घर धनयांक लाखांनी रुपयांचें लुकसाण सोंसचें पडलें. चवथीच्या काळांत घडणूक घडिल्ल्यान लोकां मदीं तिडकीचें ल्हार पातळ्ळां.
मेळिल्ले म्हायती प्रमाण बिरेस्तारा सांजवेळा साईनगरांतल्या ट्रान्सफॉर्मरांत इबाड जाल्ल्यान वाठारांतल्या घरांतले विजेचेर चलपी यंत्रणा उंचेल्या दाबाक लागून लासून गेलीं. ताचो फटको वाठारांतल्या लोकांक बसून फ्रीज, टिव्ही, फॅन आनी हेर घरांतलीं लायटीचेर चलपी साहित्य लासून लुकसाण जालें.
चवथीचो उत्सव लागीं आयिल्ल्यान घरांतल्या सजावटीचें काम सुरू आसतना लोकांक विजेच्या उच्च दाबाक लागून लुकसाण सोंसचें पडलें. सजावट सुरू आसतना रातभर काळखांत काडपाचो वेळ लोकांचेर आयलो.
साईनगरांतले ग्रामस्थ भारत नायक हांणी उच्च दाबाक लागून गांवांतल्या लोकांक चवथीच्या दिसांनी लुकसाण सोंसचे पडलें. अचकीत घरांतलो फ्रीज, टिव्ही आनी हेर साहित्य लासून गेल्ल्यान लोकांचें लाखांनी रुपयांचें लुकसाण जालें. सरकारान हाची दखल घेवन लोकांक लुकसाण भरपाय दिवपाची गरज आशिल्ल्याचें सांगलें.
मजगतीं, शुक्रारा दनपारां गांवांत नवो ट्रान्सफॉर्मर बसयले उपरांत वीज पुरवण सुरळीत जाली. सांजवेळा उसरां मेरेन वीज खात्याचे कर्मचारी स्थितीचेर नदर दवरून आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
