भांगरभूंय | प्रतिनिधी
ज्योशुआ डिसोझा: कुचेली कोमुनिदाद 20 हजार चौखण मिटर दितली सुवात
म्हापशें: म्हापश्यां रवींद्र भवना खातीर सुवात निश्चीत केल्या. कला संस्कृती खात्यानूय इत्सा व्यक्त केल्या. कुचेली कोमुनिदादीन 20 हजार चौखण मिटर सुवात दिवपाची तयारी दाखयल्या. कोमुनिदादीची स्वताची कचेरी ना. ताका लागून ह्या भवन प्रकल्पांत कचेरे खातीर सुवात सरकारान दिवची अशी तांची मागणी आसा. हे संबंदी कबलात जातकूच हो प्रकल्प चालीक लागतलो असो विस्वास उपसभापती ज्योशुआ डिसोझा हांणी उक्तायलो.
शुक्रारा कुचेले अवर लेडी ऑफ फ्लायट चर्चीची राखणे वणत परतून बांदपाच्या कामाचे बुन्यादी वेळार उपसभापती उलयताले. ह्या वेळार नगराध्यक्षा प्रिया मिशाळ, नगरसेवक चंद्रशेखर बेनकार, आनंद भाईडकार, सुशांत हरमलकार, अभियंतो संदीप कारखानीस, भौशीक बांदकाम अभियंतो महेश शेट्टी आनी हेर मानेस्त हाजीर आशिल्ले.
मुखार उलयतना डिसोझान म्हणलें, ऑक्टोबर-नोव्हेंबर म्हयन्यांत ग्रीन पार्क ते मयडें मेरेनच्या म्हापशें न्हंयेच्या पात्रांतलो गाळ उसपुपाचें काम आसा आनी वैज्ञानीक नदरेन नितळसाणे खातीर हो काळ योग्य आसा अशी म्हायती उपसभापती ज्योशुआ डिसोझा हांणी दिली.
गणेश विसर्जनाचे फाटभुंयेर सद्या तार ते मरड मेरेन म्हापशें न्हंय पात्रांतलो गाळ आनी जलपर्णीचो उपसा सुरू आसा. पावस सोंपले उपरांत उदका स्रोत मंत्री सुभाष शिरोडकार हे स्वता शाराक भेट दिवन न्हंयेची पळोवणी करतले. नोव्हेंबरांत पुराय गाळ उपसा केले उपरांत उण्यांत उणीं तीन वर्सा गाळ उपसा करपाची वेळ येवची ना अशें ज्योशुआ डिसोझान म्हणलें.
तार जंक्शनाचे वटेन म्हापशेंच्या न्हंय पात्राचे मनरिजवणेचे नदरेंतल्यान सोबितीकरण करपाचो सरकाराचो हावेस आसा. मुख्यमंत्र्यानी हाचेर उलोवप केल्लें. अजून गोंयचे खंयचेंच न्हंयचे देगेर मनरिजवणेचे नदरेंतल्यान सोबितीकरण जाल्लें ना. म्हापशें शार हें परंपरीक वेपारी केंद्र आसा. हो प्रकल्प चालीक लागल्यार शाराक सोबीतकाय येतली अशें तांणी म्हणलें.
म्हापशें शाराची भुगोलीक स्थिती वेगळी आसा. पुर्तुगेझ काळांतलीं घरां हांगा आसात. रस्तेय खूबशे कडेन शक्य आसा थंय रुंदीकरण करतात. कुचेली जंक्शनाचें प्राधान्यान रुंदीकरण आनी सोबितीकरणाचें काम सगल्यांक विस्वसांत घेवन करतले. भुंयगत वीज वाहिन्याच्या कामा खातीर रस्ते खणल्यात ते दुरुस्त करतात. नोव्हेंबर सोंपता म्हणसर शारांतले सगले रस्ते हॉटमिक्स जातले अशेंय ज्योशुआ डिसोझा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
