भांगरभूंय | प्रतिनिधी
मडगांव पुलिसांची गणेश मंडळांक सुचोवणी
मडगांव: मडगांव वाठारांतल्या भौशीक गणेशोत्सव मंडळाच्या प्रतिनिधीं कडेन जाल्ले बसके वेळार मडगांव पुलिसांनी गणेशोत्सव उत्सवा वेळार भाविकांच्या भलायकेची, सुरक्षीतताये विशीं उपाय येवजण करची. लोकांक त्रास जातलो तशेंच कायदो आनी सुवेवस्थेचो प्रस्न निर्माण जावचो ना हाची जतनाय घेवची अश्यो सुचोवण्यो केल्यो.
मडगांव पुलीस मुख्यालयांतल्या सभाघरांत जाल्ले बसकेंत मडगांव वाठारांतले सुमार 13 भौशीक गणेशोत्सव मंडळाचे प्रतिनिधी हाजीर आशिल्ले. तांकां मडगांव पुलीस उपअधिक्षक संतोष देसाय हांचे सयत, पुलीस निरिक्षक तुळशिदास नायक, फातोड्डें पुलीस निरिक्षक दितेंद्र नायक, कोलवें पुलीस निरिक्षक थेरन कुलासो बी हांणी मार्गदर्शन केलें.
मडगांव पुलिसांनी गणेशोत्सव मंडळाच्या प्रतिनिधींक उत्सव काळांत सरकारा कडल्यान जारी केल्ल्या नेमांक पाळो दिवचो. रस्त्या शेजरा माटव उबारल्यार मंडळांनी चडांत चड आपवावुरप्यांची नेमणूक करची आनी येरादारीक कसलोच त्रास जावचो ना हाची जतनाय घेवची.
दर्शन घेवपा खातीर आयिल्ल्या भाविकांचे सुरक्षीततायेचे नदरेंतल्यान सीसीटीव्ही कॅमेरे बसोवचे आनी गरजेची सुरक्षेची उपाय येवजण करची. भलायकी सुविधा उपलब्ध दवरप, हाचे बगर वीज खात्या कडल्यान आनी उजो पालोवपी दळा कडल्यान गरजेचो तो हरकत ना दाखलो घेवपाची सुचोवणी केली.
मडगांवांतल्या 13 भौशीक गणेशोत्सव मंडळांक उत्सव काळांत येरादारीक आडमेळीं जावची ना, येरादारी नेम पाळटले. माटवाचे सुवातेर लायिल्ल्या स्पिकराचो आवाज सरकाराच्या नेमा प्रमाण आसचो हाची जतनाय घेवपाक सांगलें. तशेंच खंयच्याय विशया वयल्यान धर्मीक तेढ निर्माण जावची ना हाची जतनाय घेवची. तशेंच उत्सव काळांत कांय अनुचीत प्रकार घडल्यार ते खातीर मंडळ जापसालदार आसतलें हे खातीर गरजेच्यो उपाय येवजण्यो घेवपाचेर भर दिवपाक सांगलें.
उत्सव काळांत पुलीस रातभर गस्त दवरतले. भौशीक गणेशोत्सवाचे सुवातेर पुलीस बंदोबस्त दवरतले.
पुलिसांची सुवर्णकारां कडेनूय चर्चा
गणेश उत्शवाचे फाटभुंयेर मडगांव आनी वाठारांतल्या सुवर्णकारांची बसका दक्षीण गोंय जिल्हो अधिक्षक अभिषेक धानिया हांणी घेतली. उत्सवाच्या काळांत सुवर्णकार चडांत चड भांगराच्यो वस्ती दुकानांनी दवरतात. हे खातीर ह्याच काळांत चोरयेच्यो घडणुको घडपाची शक्यताय आसता. ते फाटभुंयेर सीसीटीव्ही कॅमेरे बसोवन ते चलतात काय ना हाची खात्री करून घेवप, सुरक्षा रक्षकांची नेमणूक करप, दुकानाच्या प्रवेशदारा प्रमाणूच फाटले वटेन चोरांक प्रवेश करूंक मेळचो ना अशी वेवस्था करपाच्यो सुचोवण्यो केल्यो. सुवर्णकारांनीय पुलिसांनी उत्सव काळांत गस्तीचें प्रमाण वाडोवचें अशी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
