भांगरभूंय | प्रतिनिधी
मडगांव: दक्षीण गोंय जिल्हो भाजपा समिती वतीन 17 सप्टेंबरा सावन 2 ऑक्टोबरा मेरेनच्या काळांत दक्षीण गोंयांत सेवा पंद्रस मनयतले. ते निमतान रक्तदान शिबीर, भलायकी तपासणी शिबीर, बूथ कार्यकर्त्यां कडेन संपर्क अभियान आनी उदकाच्या तळयांची नितळसाण अश्यो कार्यावळी जातल्यो अशी म्हायती सचीव सर्वानंद भगत हांणी दिली.
दक्षीण गोंय भाजपा समिती वतीन पत्रकार परिशद घेवन सेवा पंद्रसांतली कार्यावळ जाहीर केली. ह्या वेळार दक्षीण गोंय अध्यक्ष तुळशीदास नायक, सर्वानंद भगत, शर्मद रायतूरकार, विशाल देसाय हाजीर आशिल्ले.
17 सप्टेंबर दिसा प्रधानमंत्री नरेंद्र मोदी हांचो वाडदीस आसून ते निमतान समाजीक कार्यावळी आयोजीत केल्यात. भगत हांणी सांगलें, भाजपाची खंयचीय कार्यावळ लोकांची सेवा दोळ्या मुखार दवरून करतात. 17 सप्टेंबर दिसा युवा मोर्चा वतीन रक्तदान शिबीर व्हिक्टर अपोलो ह्या हॉस्पिटलांत आयोजीत केलां. तशेंच दक्षीण गोंय जिल्हो कचेरेंत भलायकी तपासणी शिबिराचें आयोजन सकाळीं 9 ते दनपारां 1 वरां मेरेन केलां.
हातूंत रगताची तपासणी, गोडेंमूत, काळजा कडेन संबंदीत तपासणी करतले. 25 सप्टेंबर दिसा पं. दीनदयाळ उपाध्याय हांच्या जयंती निमतान बुधवार कार्यावळी जातल्यो. 2 ऑक्टोबराक महात्मा गांधी जयंती निमतान स्वच्छ भारत अभियान राबयतले. गणेश विसर्जन केल्ली तळी, बांय आदीं उदकाच्या स्रोतांची नितळसाण करतले.
सद्या गोंयांतल्या 27 मतदारसंघांनी बूथ कार्यकर्ते संपर्क अभियान सुरू आसा. उरिल्ल्या 13 मतदारसंघांनी उपरांत अभियान राबयतले अशें भगत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
