भांगरभूंय | प्रतिनिधी
पणजी, प्रतिनिधी: राज्यपाल पी. एस. श्रीधरन पिल्लई हांणी आयज दोनापावला राजभवन वाठारांत रक्तचंदन उद्यानाचें उक्तावण केलें. प्रधानमंत्री नरेंद्र मोदी हांचो १७ सप्टेंबराक ७३ वो वाडदीस आशिल्ल्यान त्या निमतान हें उक्तावण केलां.
राजभवन आनी राना खात्यान हे कार्यावळीचें आयोजन केल्लें. के. रिटा पिल्लई ह्या वेळार हाजीर आशिल्ली. राज्यपाल आनी श्रीमती पिल्लई हांणी चंदनाचो रोंपो रोयलो.
रक्त चंदन उद्यान साकार करपा खातीर सहकार्य केल्ल्या सगळ्यांचे उपकार मानून पर्यावरण सांबाळपा खातीर अशा उपक्रमांची गरज आशिल्ल्याचें राज्यपालान सांगलें. रक्त चंदन उद्यान हो राज्यपालान राजभवन वाठारांत हातांत घेतिल्लो एक तोखणायेचो उपक्रम आशिल्ल्यान मोलादीक अशा रक्त चंदनाचे लागवडीक उर्बा दिवपी आसा. हो प्रकल्प पर्यावरणाचो सांबळ आनी देशाच्या शाश्वत विकासाचो पुरावो आसा. रक्त चंदनाच्या झाडाक सांस्कृतीक, अर्थीक आनी पर्यावरणीय म्हत्त्व आसा आनी हे उद्यान मोलादीक चंदन प्रजातीची राखण करपाक म्हत्वाचें थारतलें.
राज्यपालांचे सचीव एम आर एम राव हांणीय कॅम्पसांत रक्त चंदनाचे रोंपटे लायले. ह्या वेळार राना खात्याचे उमाकांत प्रसाद, प्रवीण के. राघव, सौरभ कुमार, तेजस्विनी पुसुलुरी, क्लिफा डिकॉस्टा, श्रीमती मारियाना आनी हेर अधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
